ވެކްސިންގެ 2 ޑޯޒް ޖެހުމަށްފަހު ގިނަ ދުވަސްވުމުން އެއިން ލިބޭ ރައްކާތެރިކަން ކޮންމެވެސް ވަރަކަށް ދަށްވާތީ، ބޫސްޓަރ ޑޯޒް ޖެހުމަށް ޑރ.ނަޒްލާ އިލްތިމާސް ކުރައްވައިފިއެވެ.
އެޗް.އީ.އޯ.ސީގެ ޕްރެސް ކޮންފަރެންސެއްގައި ވާހަކަފުޅުދައްކަވަމުން ޑރ.ނަޒްލާ ވިދާޅުވީ، ބޫސްޓަރ ޑޯޒް ޖެހުމުން ވެކްސިނުން ލިބޭ ރައްކާތެރިކަން އިތުރުވާނެ ކަމަށެވެ. އަދި މިހާރު ބޫސްޓަރ ޑޯޒް ދެމުން ގެންދާއިރު، ކެޓެގަރީތަކަށް ފެތޭ މީހުން ވީހާވެސް އަވަހަށް ބޫސްޓަރ ޑޯޒް ޖެހުމަށް ޑރ.ނަޒްލާ ވަނީ އިލްތިމާސް ކުރައްވާފައެވެ.
ރާއްޖޭއިން ކޮވިޑް-19 އިން ދިފާއުވުމަށް ޖަހާ ވެކްސިންގެ ފުރަތަމަ ޑޯޒް ފުރިހަމަކުރި މީހުންގެ އަދަދު 395،586 ގައި އުޅޭއިރު، 2 ވަނަ ޑޯޒް ފުރިހަމަކުރި މީހުންގެ އަދަދު 363،150 އަށް ވަނީ އަރާފައެވެ. އަދި ބޫސްޓަރ ޝޮޓް ފުރިހަމަކޮށްފައިވާ މީހުންގެ އަދަދު 9000 އަށްވުރެ ގިނަކަންވެސް ފާހަގަކުރެވެއެވެ.
އުމުރުން 50 އަހަރުންމަތީގެ މީހުންނަށް ބޫސްޓަރ ޑޯޒް ދެމުން އަންނައިރު، ބޫސްޓަރ ޑޯޒް ދެނީ، 2 ވަނަ ޑޯޒް ފުރިހަމަކުރިތާ 6 މަސްދުވަސް ވުމުންނެވެ. މީގެއިތުރުން، ދިފާއީ ނިޒާމު ބަލިކަށި މީހުންނަށްވެސް ބޫސްޓަރ ޑޯޒް އަންނަނީ ދެމުންނެވެ.