މާލެ ސިޓީ ކައުންސިލްގެ ކުރީގެ ލޯގޯ މާ ރީތިކަމަށް ފަންނާއި، ސަގާފަތާއި ތަރިކައިގެ ވަޒީރު ޔުމްނާ މައުމޫން ވިދާޅުވެއްޖެއެވެ.
މިނިސްޓަރ ޔުމްނާ މިފަދައިން ވިދާޅުވެފައިވަނީ އެކަމަނާ ކުރެއްވި ޓްވީޓެއްގައެވެ.
މިނިސްޓަރ ޔުމްނާގެ ޓްވީޓުގައި ވިދާޅުވެފައިވަނީ، މާލެ ސިޓީ ކައުންސިލްގެ ކުރީގެ ލޯގޯއިން ރަމްޒުކޮށްދެނީ މާތްވެގެންވާ އިސްލާމްދީނާއި، މާލޭގެ ދިގު ތާރީޚާއި ޒަމާންވީ ތަރިކަ ކަމަށެވެ. އަދި ޒަމާންވީ ސަގާފަތާއި ދިވެހިންގެ އަމިއްލަވަންތަކަމާއި ފަންނުވެރިކަން އެ ލޯގޯއިން ދައްކުވައިދިންކަމަށް މިނިސްޓަރު ވިދާޅުވިއެވެ.
މާލޭ ސިޓީ ކައުންސިލްގެ ކުރީގެ ލޯގޯގައި ހުރީ ހުކުރު މިސްކިތުގެ މުންނާރެވެ. ނަމަވެސް މިހާރުގެ ލޯގޯގައި ހުރީ މާލެ ސިޓީ ކައުންސިލްގެ 6 އަވަށް ރަމްޒުކޮށްދޭ ނިޝާނެކެވެ. މިކަމާއި ގުޅިގެން ގިނަ ބައެއްގެ ފާޑުކިޔުން އަމާޒުވެފައިވާއިރު، އެ ސިޓީ ކައުންސިލްގެ ތަސައްވުރަކީ އެ ލޯގޯއިން މާލެ ސިޓީގެ 6 އަވަށްކަމަށްވާ ވިލިމާލެ، ހުޅުމާލެ، މާފަންނު، ގަޅޮޅު، މައްޗަންގޮޅި އަދި ހެންވޭރު ރަމްޒުކޮށްދިނުމެވެ.