ދީނާ ޚިލާފް ވާހަކަތަކެއް ދެއްކި އިންޑިއާ ޓީޗަރުގެ މައްސަލަ މި ފެށޭ ހަފްތާއަށް ނިންމާލެވޭތޯ މަސައްކަތްކުރަމުން އަންނަކަމަށް އެޑިއުކޭޝަން މިނިސްޓްރީން ބުނެފި އެވެ.
ދީނާ ޚިލާފް ވާހަކަތަކެއް ކްލާހެއްގައި ދައްކާފައި ވަނީ ސ.އަތޮޅު މަދަރުސާގެ ގްރޭޑް 8 ކަށް ކިޔަވައިދޭ އިންޑިއާއަށް ނިސްބަތްވާ ޓީޗަރެކެވެ. މިމައްސަލަ ފެންމަތިވެފައިވަނީ ނޮވެމްބަރު 23 ވަނަ ދުވަހު އެވެ.
މި މައްސަލައާ ގުޅިގެން "އައްޑޫލައިވް" އިން ކުރި ސުވާލަކަށް ޖަވާބުދެއްވަމުން އެޑިއުކޭޝަން މިނިސްޓްރީގެ ޕާމަނަންޓް ސެކްރެޓަރީ އަހުމަދު އަލީ ވިދާޅުވީ، މި މައްސަލަ އަދިވެސް ބަލަމުން އަންނަކަމަށެވެ. އަދި އެ މައްސަލަ އާ ގުޅިގެން ބަޔާން ނެގުމުގެ ކަންތައްތައް ކުރިއަށްދާ ކަމަށް އަހުމަދު އަލީ ވިދާޅުވި އެވެ.
ދީނާ ޚިލާފު ވާހަކަތަކެއް ދެއްކިކަމުގެ ތުހުމަތުގައި ސ.އަތޮޅު މަދަރުސާގެ ގްރޭޑް 8 ގެ ހެލްތު އެންޑް ފިޒިކަލް އެޑިއުކޭޝަން ކިޔަވައިދޭ ޓީޗަރު ވަނީ ސަސްޕެންޑްވެސް ކޮށްފަ އެވެ. އެ ޓީޗަރު ވަނީ "ކަލާންގެ ވޮޑިގެން ނުވާ" ކަމާއި ގުރުއާނުގައި ވަނީ "ހިޔާލީ ވާހަކަތަކެއް" ކަމަށް ބުނެ ދީނާ ހިލާފު ވާހަކަތަކެއް ކްލާހެއްގައި ދައްކާފަ އެވެ. އަދި "ކަލާންގެ ވޮޑިގެންވާ" ކަމުގެ ހެކި ދެއްކުމަށް ވެސް އެ ޓީޗަރު ވަނީ ދަރިވަރުންގެ ކިބައިން އެދިފަ އެވެ.