ވެކްސިންގެ 2 ޑޯޒް ފުރިހަމަނުކުރާ މީހުން ގަމުން މާލެއަށް ދަތުރުކުރާނަމަ، ޕީސީއާރު ނެގެޓިވް ނަތީޖާއަކާއެކު، އީއޯސީގެ ހުއްދަ ނަގަން ޖެހޭނެކަމަށް އައްޑޫ އީއޯސީއިން ބުނެފިއެވެ.
އީއޯސީއިން ބުނެފައިވާ ގޮތުގައި، އައްޑުއިން މާލެއަށް ދަތުރުކުރެވޭނީ ނެގެޓިވް ޕީސީއާރަކާއެކު، އައްޑޫ އީއޯސީގެ ހުއްދަ ލިބިގެންނެވެ. ނަމަވެސް ވެކްސިން ފުރިހަމަ ކޮށްފައިވާ މީހުން ޕީސީއާރު ނަތީޖާއެއްވެސް އަދި އިތުރު ހުއްދައެއްވެސް ހޯދަން ނުޖެހޭނެކަމަށް އެ ސެންޓަރުން ބުނެއެވެ.
ވެކްސިން ފުރިހަމަ ނުކުރާ މީހުން މާލެއިން އައްޑުއަށް ދަތުރުކުރާނަމަ، 14 ދުވަހުގެ ކަރަންޓީނަކާއެކު، އީއޯސީގެ ހުއްދަ ހޯދަންޖެހޭނަކަމަށް އެ ސެންޓަރުން ވަނީ ހާމަކޮށްފައެވެ.
އައްޑޫގެ ގުޅިފައިވާ ރަށްތަކުގައި ޓްރެވެލް ސާމްޕަލް ނެގުމަށް ހަމަޖެހިފައިވަނީ އައްޑޫ އެކުއެޓޯރިއަލް ހޮސްޕިޓަލުންނެވެ. އެގޮތުން ކޮންމެ ދުވަހެއްގެ 9:00 އިން 12:00 އާ ހަމައަށް ޓްރެވަލް ސާމްޕަލް ނެގުން އޮންނާނެކަމަށް، އެ ހޮސްޕިޓަލުން މައުލޫމާތުދެއެވެ.
ހުޅުދޫ އާއި މީދޫ އަވަށުގައި ޓްރެވަލް ސާމްޕަލް ނެގުން ކޮންމެ ދުވަހަކު 9:00 އިން 10:00 އަށް އޮންނާނެކަމަށް ހުޅުމީދޫ ސިއްހީ މަރުކަޒުގެ ޕަބްލިކް ހެލްތު ޔުނިޓުން މައުލޫމާތުދެއެވެ. އަދި ޓްރެވަލް ސާމްޕަލް ނެގުން އޮންނާނީ އެ މަރުކަޒުގައި ކަމަށްވެސް މައުލޫމާތު ދެއެވެ.
އައްޑޫގައި ކޮވިޑް-19 ފެތުރެމުން އަންނައިރު، ބަލި ކޮންޓްރޯލް ކުރުމަށް ރެއިން ފެށިގެން އިތުރު ފިޔަވަޅުތަކެއް އީއޯސީން ވަނީ އަޅާފަ އެވެ.