އައްޑޫ ސިޓީގައި އަޅާފައިވާ ފްލެޓުތައް ދިނުމުގެ ކުރިން އަލުން އިވެލުއޭޓް ކުރުމުގެ މަސައްކަތް ކުރިއަށްގެންދަން ނިންމައިފިއެވެ.
އައްޑޫ ސިޓީގެ މޭޔަރު އަލީ ނިޒާރު ވިދާޅުވީ ހިތަދޫގެ 16 ފްލެޓަށް 560 މީހުން ކުރިމަތިލާފައިވާ ކަމަށާއި ކައުންސިލްގެ ކުރީގެ ދައުރުގައި އޮތީ ފްލެޓްތައް އިވެލުއޭޓްކޮށް ނިންމާފައި ކަމަށެވެ. ނަމަވެސް މިހާރުގެ ބައެއް ކައުންސިލަރުން އެ ފްލެޓްތައް އެގޮތަށް ދޭން ބޭނުން ނުވާ ކަމަށާއި އަދި އައު ކައުންސިލުން ބޭނުންވީ އަލުން އިވެލުއޭޓްކުރަން ކަމަށްވެސް ނިޒާރު ވިދާޅުވިއެވެ.
"ކައުންސިލަރުންގެ ތެރެއިން ބައެއް ކައުންސިލަރުން ބޭނުމެއްނުވި [ކުރިން] އެ އޮތް ގޮތަށް ކުރިއަށް ގެންދަން. ބައެއް ކައުންސިލަރުންގެ ހިތްހަމަނުޖެހުން ހުރި." ނިޒާރު ވިދާޅުވިއެވެ.
މޭޔަރު ވިދާޅުވީ، އަލުން އިވެލުއޭޓްކުރަން ޖެހުމުން އުނދަގޫތަކެއް އެބަހުރި ކަމަށާއި ނަމަވެސް މަސައްކަތް ގާތްގަނޑަކަށް ނިމުމަކަށް އައިސްފައިވާ ކަމަށެވެ.
"އަލުން ސުވާލުކޮށް، އަލުން ފޯނުކޮށް، އަލުން ފިޒިކަލްކޮށް ބަލަންޖެހޭ ބެލުންތައް ބަލައި ހަދަންޖެހޭތީ އުނދަގޫތަކެއް އެބަހުރި" މޭޔަރު ވިދާޅުވިއެވެ.
ބޯހިޔާވަހިކަމުގެ މައްސަލަ އަކީ އައްޑޫގައި ބޮޑު މައްސަލައެއް ކަމަށްވާއިރު ފްލެޓްތަކަށް ކުރިމަތިލާން ހުޅުވާލުމުން އެތައް ހާސް ބަޔަކު ފްލެޓުތަކަށް ކުރިމަތިލަމުން ގެންދެއެވެ. ފްލެޓުތަކުގައި މިހާރުވެސް ގިނަ އަދަދަކަށް މީހުން އަންނަނީ ދިރިއުޅެމުންނެވެ.