އައްޑޫގެ އަވަށްތަކުގެ ޓުއަރިޒަމް ޒޯނުތަކުގެ ތެރެއިން ދޫނުކުރެވި ހުރި ބިންތަކަށް ވަރަށް އަވަހަށް ހުޅުވާލާނެކަމަށް އައްޑޫގެ މޭޔަރު އަލީ ނިޒާރު ވިދާޅުވެއްޖެއެވެ.
ކައުންސިލްގެ މަސައްކަތްތަކާގުޅޭ ގޮތުން ހޯމަ ދުވަހު ނޫސްވެެރިންނަށް މައުލޫމާތު ދެއްވަމުން މޭޔަރ ވިދާޅުވީ ޓޫރިޒަމް ޒޯންތަކުގެ ތެރެއިން ފޭދޫ އަދި މަރަދޫ ޓުއަރިޒަމް ޒޯނުގެ މަސައްކަތް މަޑުޖެހިފައިވީ ނަމަވެސް މަސައްކަތް ކުރިއަށް ގެންދިއުމާއި ގުޅޭ ގޮތުން މަސައްކަތް ހަވާލު ކުރެވިފައިވާ ފަރާތާއެކު ވަރަށް ފަހުން މަޝްވަރާ ކުރެވިފައިވާ ކަމަށެވެ.
ކުރީގެ ކައުންސިލިން ފަށާފައިވާ މި މަޝްރޫއު ހަވާލު ކޮށްފައިވާ އެއްބަސްވުންތަކުގައި ވިސްނާންޖެހޭ ވަރަށްގިނަ ކަންކަން ހުރިކަމަށް މެޔަރ ވިދާޅުވިއެެވެ. އެގޮތުން، ގިނަ ތަފްސީލުތައް ހިމެނިފައި ނުވެ އެއްބަސްވުންތަކުގައި ސޮއި ކުރެވިފައި ހުރިކަންވެސް މޭޔަރުވަނީ ފާހަގަކުރައްވާފަ އެވެ.
އާ ކައުންސިލް މަސައްކަތް އަވަސް ކުރަން ބެލިއިރު އެ މައްސަލަތައް ދިމާވެ އެ ޒޯނުގެ މަސައްކަތް ކުރާ ފަރާތާއެކު އެއްބަސްވުމަކަށް ނާދެވި ވަރަށް ދުވަސްވެފައި ވާކަމަށް މޭޔަރު ވިދާޅުވިއެވެ. ނަމަވެސް މިހާރު ގާތްގަނޑަކަށް ފައިނަލް އެއްބަސްވުމަކަށް އާދެވިފައި ވާކަމަށް މޭޔަރު ވިދާޅުވިއެވެ.
މަރަދޫ އަދި ފޭދޫގެ ޓުއަރިޒަމް ޒޯނުގެ މަސައްކަތްކުރަނީ އެެއް ކުންފުންޏަކުން ކަމަށާއި ކޮލިޓީގެ މައްސަލަތައް ދިމާވެފައި ހުރިކަމަށް މޭޔަރ ވިދާޅުވިއެވެ.
"މަރަދޫގައިވެސް މަސައްކަތް ވެފައި ހުރީ ކޮލިޓީ ދަށްކޮށްކަން ފާހަގަކުރެވޭ. އެހެންކަމުން މަސައްކަތް ހުއްޓުވާފައި ހުރީ." މޭޔަރު ވިދާޅުވި އެވެ.
ހިތަދޫ ޓުއަަރިޒަމް ޒޯނުގެ ލޭންޑްސްކޭޕިންގެ ގާތްގަނޑަކަށް 90 އިންސައްތަ މަސައްކަތް ނިމިފައިވާ އިރު އެތަނުގައި ބަޔަކު ގެސްޓްހައުސް އަޅުމުގެ މަސައްކަތް ވަނީ ފަށާފައިކަމަށް މޭޔަރު ވިދާޅުވިއެވެ.
މީގެ އިތުރުޏް މީދޫ އަވަށުގެ ޓުއަރިޒަމް ޒޯނުގެ 98 އިންސައްތަ މަސައްކަތް ނިމިފައިވާ ކަމަށާއި، ހުޅުދޫ ޓުއަރިޒަމް ޒޯނުގެ މަސައްކަތްވެސް ޑިސެމްބަރުމަހުގެ ތެރޭގައި ނިންމޭނެކަމަށް ކޮންޓްރެކްޓަރު ބުނެފައިވާ ކަމަށް ނިޒާރު ވިދާޅުވި އެވެ.
ޓުއަރިޒަމް ޒޯނުން ޕްލޮޓްތަކަށް އިއުލާންކޮށްގެން ބައެއް ޕްލޮޓްތައް މީހުންނާ ހަވާލުވެވިފައިވާކަން ނިޒާރު ވަނީ ފާހަގަކުރައްވާފަ އެވެ.
"މިތަންތަނުން ގިނަ ޕްލޮޓްތަކަށް ވަނީ އިއުލާންކޮށްގެން ހަވާލުވެވިފައި. މިހާރު ބާކީ ތިބި ތަންތަން އިއުލާންކުރުމުގެ ފަހުގެ މަސައްކަތްތައް ކައުންސިލުން ފަށައިފި" މޭޔަރު ވިދާޅުވި އެވެ.
ޓުއަރިޒަމް ޒޯންތަކަށް ކަރަންޓާއި ފެނާއި ނަރުދަމާ ގެ މަސައްކަތް ކުރުމަށް ފެނަކަ އާއި އެކު މަޝްވަރާ ކުރިއަށްދާއިރު އަގަކާމެދު އެއްބަސް ނުވެވިގެން އިތުރު 6 މިލިއަން ސަރުކާރުން ދީފައިވާ ކަމަށް ނިޒަާރު ވިދާޅުވިއެވެ.
"ފެނަކައާއެކު އަގަކާމެދު އެއްބަސް ނުވެވިގެން އިތުރަށް ސަރުކާރުން 6 މިލިއަން ދީގެން 16 މިލިއަން މިހާރު ވަނީ ލިބިފައި. މަސައްކަތް ފަށަން ވެފައިހުރީ." ނިޒާރު ވިދާޅުވި އެވެ.
މީގެއިތުރުން ނިޒާރު ވިދާޅުވީ، ފެނާއި ނަރުދަމާގެ ކަންކަން ކުރިއަށް އޮތް އަހަރަށް ބަޖެޓުކުރެވިފައިވާ ކަމަށެވެ.
އައްޑޫގެ ޓުއަރިޒަމް ޒޯންތަކުގެ މަސައްކަތް ކުރިއަށް އޮތް އަހަރު ތެރޭގައި ނިމޭނެކަމަށް މޭޔަރު ވަނީ ފާހަގަކުރައްވާފަ އެވެ. މި ޒޯންތަކާއެކު އައްޑޫގައި ޓުއަރިޒަމްގެ ހަރަކާތްތައް ފުޅާކޮށް ކުރިއަށް ގެންގޮސް، އާންމުންނަށް ނަފާވާނެ ކަމަށް ގިނަ ބަޔަކު ގަބޫލުކުރެ އެވެ.