މަލީހް އައްޑު އަށް

ޔޫތު މިނިސްޓަރު މުހައްމަދު މަލީހް ޖަމާލް މިރޭ އައްޑު އަށް ވަޑައިގަންނަވާ ގޮތަށް ހަމަޖެހިއްޖެ އެވެ.

އެ މަނިކުފާން އައްޑު އަށް ވަޑައިގަންނަވަނީ އަންނަ މެއި މަހު ރާއްޖޭގައި ބާއްވާ އޭއެފްސީ ޗެލެންޖް ކަޕްގެ ބައެއް މެޗްތައް ހިތަދޫ ޒޯން ސްޓޭޑިއަމްގައި ކުރިއަށް ގެންދާ ގޮތަށް ނިންމާފައިވާތީ، އެ ސްޓޭޑިއަމް ތަރައްގީ ކުރަން ކުރަން ޖެހޭ މަސައްކަތްތައް އިފުތިތާހުކޮށް ދެއްވުމަށްޓަކަ އެވެ.

މިއީ މިނިސްޓަރުކަމާ ހަވާލުވެވަޑައިގެންނުމަށް ފަހު މަލީހް އައްޑު އަށް ވަޑައިގަންނަވާ ފުރަތަމަ ދަތުރެވެ.

އެ ރަސްމިއްޔާތު އޮންނާނީ މިރޭ 9:00 ޖަހާ އިރު ހިތަދޫ ޒޯން ސްޓޭޑިއަމްގަ އެވެ.

މާލޭ ގަލޮޅު ދަނޑާއި ހިތަދޫ ޒޯން ސްޓޭޑިއަމް ތަރައްގީ ކުރުމުގެ މަސައްކަތް ހަވާލު ކުރި، އަމީން ކޮންސްޓްރަކްޝަނުން އެ މަސައްކަތް މިހާރު ވަނީ ފަށައިފަ އެވެ.

އެގޮތުން ހިތަދޫ ޒޯން ސްޓޭޑިއަމްގެ ސިޑި ބަރި ބޮޑުކޮށް، އެތަނުގައި ގާއިމު ކުރަން ޖެހޭ ވަސީލަތްތައް ގާއިމު ކުރަން، މިހާރު ހުރި ސިޑިބަރީގެ ފުރާޅު ވަނީ ރޫޅާލަން ފަށައިފަ އެވެ.

އަމީނާ އެ މަސައްކަތް ހަވާލު ކުރީ 71.5 މިލިއަން ޑޮލަރަށެވެ.