ސ. ހިތަދޫ ޒޯން ސްޓޭޑިއަމް އޭއެފްސީން ކަނޑައަޅާ މިންގަނޑަށް ތަރައްގީވެގެން ދިއުމަކީ އައްޑޫގެ އިތުރުން މި ސަރަހައްދުގެ އެހެން އަތޮޅުތަކުގެ ކުޅިވަރަށް ވެސް ލިބޭނެ ވަރަށް ބޮޑު ކުރިއެރުމެއް ކަމަށް ޔޫތު މިނިސްޓަރު މުހައްމަދު މަލީހް ޖަމާލް ވިދާޅުވެއްޖެ އެވެ.
އޭނާ މިހެން ވިދާޅުވީ އޭއެފްސީ ޗެލެންޖް ކަޕް އަންނަ މޭއި މަހު ރާއްޖޭގައި ބާއްވާތީ އެ މުބާރާތުގެ ބައެއް މެޗްތައް ކުޅޭ، ހިތަދޫ ޒޯން ސްޓޭޑިއަމް ތަރައްގީ ކުރުމުގެ މަޝްރޫއުގެ ބިންގާ މިރޭ އަޅުއްވައި ދެއްވުމަށް ފަހު އެވެ.
މިނިސްޓަރު ވިދާޅުވީ ޒޯން ސްޓޭޑިއަމް ތަރައްގީވުމަކީ މި ސަރަހައްދުގެ އެކިއެކި ގައުމުތަކުގެ ޓީމްތަކާއި އެކިއެކި މުބާރާތްތައް ބާއްވަން ހުޅުވޭ ދޮރެއް ކަމަށެވެ.
އެހެންވެ ކުރިއަށް އޮތް ތަނުގައި ހިތަދޫ ޒޯން ސްޓޭޑިއަމަކީ ބައިނަލްއަގްވާމީ ބައެއް މުބާރާތްކުގެ އޯޕަނިން އާއި ކުލޯޒިން މެޗްތައް ބާއްވާނެ ސްޓޭޑިއަމަކަށް ވާނެ ކަމުގެ އުންމީދު ބޮޑު ކަމަށް މިނިސްޓަރު ވިދާޅުވި އެވެ.
ހިތަދޫ ޒޯން ސްޓޭޑިއަމް ތަރައްގީ ކުރުމުގެ މަޝްރޫއުގެ ތެރެއިން މިހާރު ހުރި، ސިޑިބަރި ދެ ފަރާތުން ބޮޑުކޮށް، ސިޑިބަރީގެ ދަށުގައި އެކިއެކި ކަންކަމަށް ބޭނުން ކުރާނެ ރޫމްތައް ހަދާނެ އެވެ.
އަދި އެތަނުގެ ދަނޑުގެ ލައިޓިން ސިސްޓަމް ވެސް ވަރުގަދަ ކުރަން ވަނީ ނިންމައިފަ އެވެ.
އޭއެފްސީ ޗެލެންޖް ކަޕަށް ޒޯން ސްޓޭޑިއަމާއި މާލޭ ގަލޮޅު ދަނޑި ތަރައްގީ ކުރަން 71.5 މިލިއަން ރުފިޔާ އަށް ހަވާލު ކުރީ އަމީން ކޮންސްޓްރަކްޝަނާ އެވެ.
އެ ކުންފުނީގެ މެނެޖިން ޑިރެކްޓަރު އަބްދުﷲ މުހައްމަދު ވަނީ މި މަސައްކަތް އައްޑޫގައި ކުރިއަށްދާ އިރު، އާންމު ރައްޔިތުން ވެސް މިކަމަށް އެއްބާރުލުމާއި އެހީތެރިކަން ދިނުމަށް އެދިވަޑައިގެންފަ އެވެ. އަދި މަސައްކަތުގައި މުޅިން ވެސް ބޭނުން ކުރާނީ ދިވެހިން ކަމަށް ވިދާޅުވި އެވެ.