ކުރީގެ ރައީސް އަބްދުﷲ ޔާމިންގެ މައްޗަށް އިއްވާފައިވާ ޖަލު ހުކުމް ބާތިލްކުރުމާ ގުޅުގެން ރަށްރަށުގައި ތިބި އެމަނިކުފާނުގެ ސަޕޯޓަރުން ބޮނޑިބަތް ކައްކާ ކެއުންތައް ބަހަން ތައްޔާރުވެއްޖެ އެވެ.
މިއަދު މެންދުރު ސުޕްރީމް ކޯޓުން ކުރި ހުކުމާއެކު އެމަނިކުފާނު މިނިވަން ވުމުން ރަށްރަށުގައި ތިބި ޕީޕީއެމްގެ މެމްބަރުން ވަނީ މިއަދު ހަވީރަށް ކެއުންތައް ބާއްވަން ތައްޔާރުވާން ފަށާފަ އެވެ. އަދި ބައެއް ރަށްރަށުގައި ވަނީ ފޮނިތަކެތި ކައްކައިގެން ގޭގެއަށް ބަހާފަ އެވެ.
މަނީ ލައުންޑަރިންގެ ކުށުގައި ޔާމިނަށް އިއްވާފައިވާ ޖަލު ހުކުމަށް ސުޕްރީމް ކޯޓުން ތާއިދުކުރި ނަމަ ދެން އަންނަ ރިޔާސީ އިންތިހާބުގައި ވާދަކުރުމުގެ ފުރުސަތު އެމަނިކުފާނަށް ގެއްލޭނެ އެވެ. ޔާމިން މިނިވަންވުމުގެ އުފަލުގައި އެމަނިކުފާނުގެ ބައެއް ސަޕޯޓަރުން ކެއުން މިއަދު ހަވީރަށް ތައްޔާރުކުރާއިރު އަނެއްބައި ރަށްރަށުގައި ކެއުން ތައްޔާރުކުރަނީ މިރެއަށެވެ.
މިއީ 2013ގައި ރައީސް ޔާމިނަށް ރިޔާސީ އިންތިހާބު ކާމިޔާބު ކުރެވުމަށްފަހު ލިބުނު އެންމެ ބޮޑު އުފަލެވެ.