ހުރިހާ ނުފޫޒުތަކަކުން އެއްކިބާވެފައި އޮތް އަދުލުގެ ނިޒާމެއް ކަމަށް ރައްޔިތުން ގަބޫލުކުރާ މިންވަރަށް އަދުލު ނިޒާމް ބަދަލުވެގެން މެނުވީ ދިވެހި ރާއްޖެއަށް ދިރިމެއް ނެތް ކަމަށް ކުރީގެ ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ.
މަނީލޯންޑަރިންގެ ކުށުގައި ރައީސް ޔާމީންގެ މައްޗަށް ދަށު ކޯޓުން ކުރި ހުކުމް ސުޕްރީމް ކޯޓުން އިއްޔެ ބާތިލްކުރުމާ ގުޅިގެން މިރޭ ޕީޕީއެމް އޮފީހުގައި ބޭއްވި ޖަލްސާގައި ރައީސް ޔާމިން ވަނީ ޝަރުއީ ދާއިރާއަށް ނުފޫޒުފޯރިވާކަމަށް ވިދާޅުވެ ވަރަށް ބޮަޑަށް ފާޑު ވިދާޅުވެފަ އެވެ. އެމަނިކުފާނު ވިދާޅުވީ ނުފޫޒެއް ނެތް ޝަރުއީ ދާއިރާއެއް އޮތް ކަމަށް ރައްޔިތުން ގަބޫލު ނުކުރާ ނަމަ ރާއްޖެއަށް ކުރިއެރުމެއް ނެތް ކަމަށެވެ.
ވެރިކަމުގެ ނިޒާމްގެ ތެރެއިން ރާއްޖޭގެ ޝަރުއީ ނިޒާމަށް ނުފޫޒުފޯރުވަމުންދިޔަ ވާހަކައަކީ މީގެ ކުރިން ބަޔަކު ދެއްކި ވާހަކައެއް ކަމަށާއި އެކަމީ ވެސް ރަނގަޅުކަމެއް ނޫން ކަމަށް ފާހަގަ ކުރައްވާ ރައީސް ޔާމިން ވިދާޅުވީ އެހެން ގޮތް ގޮތުން ނުފޫޒު ފޯރުވުމަށްވެސް "އޯކޯ"ނޫން ކަމަށެވެ.
" އަދުލު ނިޒާމަކީ ހަމަ ހަގީގަތުގައިވެސް އަދުލުވެރިކަމާ އެކީ ގާނޫނު ދެމެހެއްޓުން. ޝަރީއަތް ދެމެހެއްޓުން. އެހެންވީމަ އެކަމަށް މި އައިސްސަ އޮތް ފޮއްސިކަން ނޫނީ މިއައިސްސަ އޮތް ކޮރުކަން ފިލަންދެން އަދުލު ނިޒާމާމެދު އޮތް ތުހްމަތު އޮންނާނެ." ރައީސް ޔާމިން ވިދާޅުވި އެވެ.
ފަނޑިޔާރުގެއަށް މި ވަގުތު އައިސްފައިވާ ކޮރުކަމެއް ކަމަށް ރައީސް ޔާމީން އިޝާރާތް ކުރެއްވީ އެމަނިކުފާނަށް ކްރިމިނަލް ކޯޓުން ހުކުމްކުރެއްވި ފަނޑިޔާރުންގެ ބެންޗްގައި ހިމެނޭ ތިން ފަނޑިޔާރަކު ޝަރީއަތާ ގުޅޭ ގޮތުން ދެއްކެވި ކަމަށް ބުނެ ލީކްކޮށްފައިވާ އޯޑިއޯތަކަށެވެ. އެމަނިކުފާނު ވިދާޅުވީ އަދުލުގެ ނިޒާމް ރަނގަޅުވިކަމަށް ބުނާ ކަމަށްވާނަމަ އެ އޯޑިއޯތަކާ ގުޅޭ ގޮތުން ތަންފީޒީ އިދާރާއަކުން އެއްޗެއް ބުނަން ޖެހޭ ކަމަށެވެ. އަދި އެކަމާ ގުޅޭ ގޮތުން މިހާތަނަށްވެސް ރަސްމީ އިދާރާއަކުން އެއްޗެއް ނުބުނެ ލަސްވި ލަސްވުމަކީ އެކަމާ މެދު ސުވާލު އުފެދޭ ކަމެއް ކަމަށްވެސް ރައީސް ޔާމީން ވިދާޅުވި އެވެ.
"އެހެންވީމަ ޝަރިއަތުގައި ކަންކަން ނިންމާ ގޮތައް، ޝައްކެތް ނެތް މިންވަރަށް މިކަން ރައްޔިތުންނަށް އެނގެން އެބަ ޖެހޭ. މިހާރު މިކަން މި އޮތީ ޝައްކުގެ ތެރޭގައި،" ޔާމިން ވިދާޅުވި އެވެ.
މީގެ އިތުރުން ރައީސް ވިދާޅުވީ ފަނޑިޔާރުންގެ އެ އޯޑިޔޯތަކާމެދު ޖަވާބެއް ލިބިގެން މެނުވީ އެ ބޭފުޅުން ބޭނުންވާ ގޮތައް ޝަރުއީ ނިޒާމް ތާހިރު ނުކުރެވޭނެ ކަމަށެވެ.