ރާއްޖެއަށް ވައިގެމަގުން 18 ކިލޯގެ މަސްތުވާތަކެތި އެތެރެކުރި މައްސަލައިގައި ހައްޔަރުކުރި ބްރެޒިލްގެ އަންހެންމީހާ ނައިރު ނުނެސް ޑިސްސޫޒާ ބަންދުން ދޫކޮށްލައިފިއެވެ.
މި އަންހެން މީހާގެ މައްޗަށް ފުލުހުން ތުހުމަތު ކުރަނީ މަސްތުވާތަކެތި ޓްރެފިކް ކުރުމުގެ ކުށެވެ. އެ ތުހުމަތުކުރާ ސަބަބެއްގެ ގޮތުން ފުލުހުން ބުނެފައިވަނީ މީނާއާއެކު މާލޭއައި ބްރެޒިލްގެ ރައްޔިތެއް ކަމަށްވާ ކްރިސްޓިއާނޯ ސިލްވާ ރޮޑްރިޖް ޖޫނިއާގެ ލަގެޖުގެ ތެރެއިން 18 ކިލޯގެ ކޮކެއިން ފެނިފައިވާކަމަށެވެ. މަސްތުވާތަކެތި ފެނުނު ލަގެޖުގައިވަނީ ކްރިސްޓިއާނޯ ސިލްވާގެ ޓެގް ކަމަށް ފުލުހުން ބުނެފައިވެއެވެ. އަދި ކަސްޓަމްސްއިން މި ލަގެޖް ބަލާފާސްކޮށްފައިވަނީވެސް ހަމައެކަނި ކްރިސްޓިއާނޯ ސިލްވާގެ ހާޒިރުގައި ކަމަށެވެ.
އެ އަންހެން މީހާ ބަންދުން ދޫކޮށްލުމަށް ނިންމާ ކްރިމިނަލް ކޯޓުން ފާހަގަކޮށްފައިވާ ކަންތައްތަކުގެ ތެރޭގައި ބުނެފައިވަނީ، މަސްތުވާތަކެއްޗާބެހޭ ޤާނޫނުގެ 143 ވަނަ މާއްދާގައި މީހެއްގެ އަތުގައި މަސްތުވާތަކެތި ހުރީ ކަމުގައި ބެލެވޭނެ ސަބަބުތަކެއް ބަޔާންކޮށްފައިވާއިރު، އެއިން ކަމަކަށް މީނާ ފެތޭ ކަމުގައި ފުލުހުން ބުނެފައި ނުވާކަމަށެވެ. އަދި އެ މާއްދާފައިވާ ކަންކަމުގެ އިތުރުން މީހެއްގެ އަތުގައި މަސްތުވާްއެއްޗެއް ހުރީ ކަމުގައި ބަލާނެ އެހެން ސަބަބެއްވެސް އޮތްކަމަށް ބެލެވޭފަދަ ސަބަބެއް ފުލުހުން ފާހަގަކޮށްފައި ނުވާކަމަށެވެ.
މަސްތުވާތަކެއްޗާބެހޭ ގާނޫނުގެ 146 ވަނަ މާއްދާގައި އެކެއްގެ އަތުގައިހުރި މަސްތުވާއެއްޗެއް އެހެން މީހެއްގެ އަތުގައިވެސް ހުރީ ކަމުގައި ބެލެވޭނީ ދެ އުންސުރެއް ފުރިހަމަވެގެން ކަމަށް ބަޔާންކޮށްފައިވާކަމަށާއި އެގޮތުން ފުރަތަމަ އުންސުރަކީ އޭނާއަށް އެނގިގެން އެހެން މީހެއްގެ އަތުގައި މަސްތުވާތަކެތި ހުރުންކަމަށާއި، ދެވަނަ އުންސުރަކީ އޭނާގެ ރުހުމާއެކު އަނެއް މީހާ އަތުގައި މަސްތުވާތަކެތި ހުރުން ކަމަށެވެ. މި ދެ އުންސުރުގެ ތެރެއިން އެއްވެސް ކަމެއް ފުރިހަމަވާކަމަށް ބެލެވޭނެ އެއްވެސް ހެއްކެއް ނުވަތަ ގަރީނާއެއް ހުށަހެޅިފައިނުވާކަމަށްވެސް ފާހަގަކޮށްފައިވެއެވެ.
މީގެއިތުރުންވެސް ޝަރީއަތަށް ފާހަގަކުރެވުނު ކަންކަމުގެ ގޮތުގައި ބަންދު އަޑުއެހުން ބެއްލެވި ގާޒީ އަލީ ނަދީމް ވިދާޅުވެފައިވަނީ، އެކުގައި ދަތުރުކުރުމާއި އެއް ލަގެޖެއްގައި އަންނައުނު ހުރުމަކީ ކޮންމެވެސް މިންވަރެއްގެ ތުހުމަތު އުފެދޭފަދަ ސަބަބެއް ނަމަވެސް، މީނާ ބަންދުގައި ހުންނަތާ މަހެއްހާ ދުވަސްވީއިރު، ކްރިސްޓިއާނޯ ސިލްވާގެ ލަގެޖުގައި މަސްތުވާތަކެތި ހުރީ މީނާގެ އެންގުމާއި ރުހުން ލިބިގެންކަމަށް ތުހުމަތުކުރެވޭފަދަ އިތުރު އެއްވެސް ހެއްކެއް ނުވަތަ ގަރީނާއެއް ހޯދިފައިނުވާކަމަށެވެ.
އަދި ބުނެފައިވަނީ މަސްތުވާތަކެތި ހުރި ލަގެޖު ބަލައިފާސްކޮށްފައިވަނީ މީނާގެ ޣައިރު ހާޒިރުގައިކަމުން އެ ލަގެޖުން ފެނުނު މަސްތުވާތަކެއްޗާމެދު މީނާ ޒިންމާވާންޖެހޭ ސަބަބެއްވެސް ނެތްކަމަށެވެ.
އެހެންކަމުން ކޮންމެވެސް މިންވަރެއްގެ ތުހުމަތު ކުރެވި ބަންދުގައި ހުންނަތާ 29 ދުވަސް ވެފައިވާއިރު، ކޮންމެވެސް މިންވަރެއްގެ ތުހުމަތު ކުރެވުމުގައި މިންގަނޑުން ނެއްޓި ތުހުމަތެއް ވުޖޫދުވާ މިންވަރަށް ހެކި ގަރީނާ ހޯދިފައިނުވާތީއާއި، ތުހުމަތެއް ވުޖޫދުވާ މިންވަރުގެ ހެއްކެއް ހޯދުމުގެ މަސައްކަތެއްވެސް ފުލުހުން ކުރަމުން ނުތާތީ ބަންދުން ދޫކޮށްލުމަށް ނިންމާކަމަށެވެ.