އައްޑޫ ސިޓީގައި ކާޅު ގިނަވާ މައްސަލަ ފެންމަތިވެއްޖެ އެވެ.
އައްޑޫ ސިޓީގެ ބައެއް އަވަށްތަކުން ކާޅު ފެނުމާއި ގުޅިގެން ބައެއް މީހުން ވަނީ ސޯޝަލް މީޑިއާގައި ނުރުހުން ފާޅުކޮށްފަ އެވެ. އެގޮތުން، ކާޅަކީ އައްޑޫގައި އާންމު ގޮތެއްގައި އުޅޭ އެއްޗަކަށް ނުވެފައި، އައްޑޫގެ ދޮންދީނި އާއިލާ ނެތިދިއުމުގެ ބިރު ވަނީ ހީވެފައި ކަމަށް ގިނަ ފަރާތްތަކުން ބުނެ އެވެ.
ސޯޝަލް މީޑިއާގައި މީހަކު ހިއްސާ ކޮށްފައިވާ ފޮޓޯއަކުން ރުކެއްގައި 4 ކާޅު ތިބި މަންޒަރު ފެނެ އެވެ. މި ފޮޓޯ ނަގާފައިވާ މީހާ ބުނެފައިވާ ގޮތުން އެއީ އައްޑޫ ސިޓީ މީދޫ އަވަށުގެ މަންޒަރެކެވެ.
އައްޑޫގައި ކާޅު ގިނަވުމުގެ ސަބަބުން އެ މެރުމުގެ ހުއްދަ އެންވަޔަރޮމެންޓް މިނިސްޓްރީން ވަނީ އައްޑޫ ސިޓީ ކައުންސިލަށް ދީފަ އެވެ. އަދި މި އަހަރު ތެރޭގައި ބަޑި ޖަހައި ކާޅު މެރުމަށްވެސް ސިފައިން ވަނީ މަސައްކަތް ކޮށްފަ އެވެ.
ދޮންދީނި އަކީ އައްޑޫގެ ވަރަށް ބޮޑު ފަހުރެކެވެ. ހުދު ކުލައިގެ މި ރީތި ދޫނި އުޅެނީ އައްޑޫ ސިޓީގެ ރަށްތަކާއި ހުވަދޫގެ ފަޅު ރަށެއް ކަމަށްވާ ހައޮޑިގަލާގައި އެކަންޏެވެ.