އިއްޔެ ދިރާސީ އާ އަހަރު ފެށުނު އިރު ސ. ހިތަދޫ ސްކޫލްގައި ޕްރިންސިޕަލަކު ނެތިގެން ބެލެނިވެރިން ކަންބޮޑުވުން ފާޅު ކުރަން ފަށައިފި އެވެ.
މިދިޔަ އަހަރު ނިމުނު އިރު އެ ސްކޫލްގެ ޕްރިންސިޕަލަކަށް ހުންނެވީ ރ. ހުޅުދުއްފާރަށް ނިސްބަތްވެވަޑައިގަންނަވާ މުހައްމަދު ޝުކުރީ އެވެ.
އޭނާ އެ މަގާމާ ހަވާލުވީ މިދިޔަ އަހަރުގެ ޖުލައި މަހުގެ ތެރޭގަ އެވެ.
އެހެން ނަމަވެސް މި އަހަރުގެ ދިރާސީ އާ އަހަރު ފެށުނު އިރު، ޔުނިވަސިޓީ އޮފް މެލޭޝިއާ އިން ގްރެޖްއޭޓް ޝުކުރު ވަނީ އެ މަގާމު ދޫކުރައްވައި އައްޑޫން ވަޑައިގެންފަ އެވެ.
ޝުކުރު އޭރު މަގާމާ ހަވާލުވެވަޑައިގެންނެވީ ހިތަދޫ ސްކޫލްގައި ޕްރިންސިޕަލެއްގެ ގޮތުގައި ހުންނެވި އަލީ ހާލިދު މަގާމުން އިސްތިއުފާ ދެއްވުމާ ގުޅިގެން ޕްރިންސިޕަލަކު ހަމަނުޖެހި ގިނަދުވަސްތަކެއް ވެފައި ވަނިކޮށެވެ.
ގްރޭޑް 1-10 އަށް ކިޔަވައިދޭ ހިތަދޫ ސްކޫލްގައި ޕްރިންސިޕަލަކު ނެތް މައްސަލާގައި ބެލެނިވެރިން ކަންބޮޑުވުން ފާޅު ކުރަމުން އަންނަ އިރު، އެ މަގާމަށް އެޑިއުކޭޝަން މިނިސްޓްރީން ބޭފުޅަކު ހަމަޖައްސަން މަސައްކަތް ކުރަމުންދާ ކަމަށް އެނގިފައިވެ އެވެ.