ހުޅުމާލޭގައި ކްލިކް ކޮލެޖުން ބޭއްވި އިވެންޓެއްގައި ނަސާރާ ދީން ޕްރޮމޯޓްކުރާ ލަވައެއް ޖެހުނީތީ އެ ކޮލެޖުން މާފަށް އެދެފިއެވެ.
ކްލިކް ކޮލެޖުން ހުޅުމާލޭގައި އިއްޔަ ބޭއްވި ކިޑްސް ސްޕޯޓްސް ފެސްޓިވަލްގައި ނަސާރާ ދީން ޕްރޮމޯޓުކުރާ ލަވަތަކެއް ޖެހި މައްސަލަ ދީނީ ގިނަ ޖަމިއްޔާތަކެއް އެކުލެވިގެންވާ ރައްޔިތުންގެ އިއްތިހާދުން ވަނީ ފުލުހުންނަށް ހުށަހަޅާފައެވެ.
މިކަމާ ގުޅިގެން ކްލިކް ކޮލެޖުންވަނީ ހަރަކާތުގައި ނަސާރާ ދީނުގެ ލަވަ ޖެހީ، ގަސްތުގައި ނޫންކަމަށް ބުނެފައެވެ. އަދި އެކަމަށް މާފަށް އެދޭކަމަށެވެ.
"މިކަމަށް އެންމެ ރައްޔިތުންގެ ފަރާތުން ނިހާޔަތައް މައާފަށް އެދެން" ކްލިކް ކޮލެޖުން ބުންޏެވެ.
މީގެއިތުރުން، އެ ކޮލެޖުން ބުނީ، އެ ލަވަ ޖެހުނުކަން އެނގުމާއެކު އިވެންޓްގެ ސައުންޑާ ހަވާލުވެގެން ތިބި ފަރާތުން އެ ލަވަ ބަދަލުކޮށްފައިވާ ކަމަށެވެ.
ރައްޔިތުންގެ އިއްތިހާދުން ކޮމިޝަނަރ އޮފް ޕޮލިސް މުހައްމަދު ހަމީދަށް ފޮނުވި ސިޓީއެއްގައި ވަނީ ކްލިކް ކޮލެޖްގެ ހަރަކާތުގެ މައްސަލަ ބަލައި އެކަމުގައި ގާނޫނީ ގޮތުން ޒިންމާވާ ފަރާތްތަކާ މެދު ގާނޫނީ ފިޔަވަޅު އަޅައި އެ ފަރާތްތަކަށް ދައުވާކޮށް ދިނުމަށް އެދިފައެވެ.