ބޮލީވުޑްގެ މަޝްހޫރު އެކްޓަރު އިމްރާން ހާޝިމީގެ ހަތަރު އަހަރުގެ ފިރިހެން ދަރިފުޅަށް ކެންސަރު ޖެހިގެން ފަރުވާ ދޭން ފަށައިފި އެވެ.
މި ހިތާމަވެރި ހަބަރު ފޭނުންނާ ހިއްސާ ކުރީ އިމްރާންގެ ބޮޑު ބޭބެއެއް ކަމަށްވާ ޑައިރެކްޓަރު/ޕްރޮޑިއުސަރު މަހޭޝް ބަޓެވެ.
ޓްވިޓާ މެދުވެރިކޮށް މަހޭޝް މި ހަބަރު ހިއްސާ ކުރުމާ އެކު، އިމްރާނަށާއި އޭނާގެ އާއިލާ އަށް ގިނަ ބައެއްގެ ހަމްދަރުދީގެ މެސެޖްތައް ވަނީ ލިބެން ފަށައިފަ އެވެ.
ކާމިޔާބު ގިނަ ފިލްމްތަކެއް ކުޅެފައިވާ ޒުވާން އެކްޓަރުގެ ހުރި ހަމައެކަނި ދަރިފުޅު އަޔާން އަށް މުމްބާއީގެ ހިންދޫޖާ ހޮސްޕިޓަލުގައި މިހާރު އަންނަނީ ފަރުވާ ދެމުންނެވެ.
އަދި ގަވައިދުން އަޔާންގެ ފަރުވާގެ ކަންތައްތައް ގާތުން ޑޮކްޓަރުން ބަލަމުން އަންނަ އިރު، ކީމޯތެރަޕީ ފަރުވާ ވެސް ކުޑަކުޑަ އަޔާނަށް މިހާރު ވަނީ ދޭން ފަށައިފަ އެވެ.
އަޔާން އަދި އޮތީ ކެންސަރުގެ އެންމެ ފުރަތަމަ މަރުހަލާގައި ކަމަށް ބޯންމެރޯ ރިޕޯޓްތަކުން ދައްކަ އެވެ.
ބޮލީވުޑްގައި "ސީރިއަލް ކިސާ" ގެ ނަމުން މަޝްހޫރު އިމްރާނާއި ޕްރީ ސްކޫލް ޓީޗަރެއް ކަމަށްވާ ޕަރްވީން ޝަހާނީ ކައިވެނި ކުރީ 2006 ގަ އެވެ.