"ތިޔަ ބޭފުޅުން މިފަދަ ގޮނޑިއެއްގައި އިންނަން ޖެހޭ ދުވަހު ތި ބޭފުޅުން ހިތައްއަރާނެ އަޅުގަނޑުމެން މި އުފުލަނީ ކިހާ ބޮޑު ބުރައެއްކަން. އަޅުގަނޑުމެނަށް އެހެން މީހުންގެ ލޮތްބާ އޯގާތެރިކަން ބޭނުންވާ ފަދައިން ހަމަ ތިޔަ ބޭފުޅުންނަށްވެސް ލޮތްވާ އޯގާތެރިކަން ބޭނުންވާނެކަން. އޭރުން ތި ބޭފުޅުންނަށް އަސަރުކުރާނެ. ރޮވޭނެ. އިހްސާސް ކުރެވޭނެ. އެކަމު އޭރުން އޮންނާނީ ވަގުތު ފާއިތުވެފައި،" މިއީ ނުކުޅެދުންތެރިކަން ހުންނަ މީހުންނަށް ކޮންމެ ދެ އަހަރަކުން އެއް އަހަރުދޭ ރިވެލި އެވޯޑް ދިނުމަށް ރޭ ބޭއްވި ޖަލްސާގައި އެ އެވޯޑް ހާސިލްކުރި އިހަވަންދޫ ސްކޫލުގެ ޑައިމަންޑް ކުލާހުގެ ދަރިވަރު މުހައްމަދު މާއިޒު ދެއްކި ވާހަކައިގެ ތަންކޮޅެކެވެ.
ފޮރޮޅުލީ ގޮނޑިއެއްގައި އިނދެ ދައުލަތުގެ އެންމެ މަތީވެރިންކުރިމަތީ މާއިޒު އޭނާގެ ހިތުގެ އުދާސްތައް ބޭރުކުރަމުންދިޔައީ ފުން އަސަރާއެކު އެވެ. ހއ.އިހަވަންދޫއަށް އުފަން މާއިޒުގެ އެ ވާހަކަތައް ވަގުތުން ޓީވީތަކުން ބަލަމުންދިޔަ އެތައް ހާސް މީހުން ތިއްބެވެ. މާއިޒު ވިސްނާ ދެމުންދިޔައީ ނުކުޅެދިުންތެރިކަން ހުންނަ ފަރާތްތަކަށް އެހެން މީހުންގެ އެހީތެރިކަމާ އޯގާތެރިކަން ބޭނުންވާނެ ކަމެވެ.
ތައުލީމީ ދާއިރާއިން އެވޯޑް ހާސިލްކުރި މާއިޒު ފަށުވި އަދި އަޑުއަހާލަން ރީތި ބަސްތައް އަމުނަމުންދިޔަ އިބްރަތުން ފުރިގެންވާ އެ ބަސްތަކުން އެންމެނަށްވެސް އަސަރު ކުރުވިކަން އެނގެ އެވެ. ނުުކުޅެދުންތެރިކަން ހުންނަ ކުއްޖެއްގެ އިހްސާސް ބުނެދިނީ އެފަދަ ކުދިންނާމެދު އިހްމާލުވެ ލޯމަރާލައިގެން ތިބި މީހުނަށްވެސް އެއިން އަސަރު ނުކޮށްނުދާނެހާ ފުރިހަމަކޮށެވެ.
އިހަވަންދޫ ސްކޫލުގެ ޑައިމަންޑް ކުލާހުގެ ދަރިވަރު މުހައްމަދު މާއިޒު ދެއްކި ވާހަކައަކީ އިބުރަތުން ފުރިގެންވާ ވާހަކަ ކޮޅެއް. އެއީ ވަރަށް ވާހަކަ. ❤️❤️❤️
— Ahmed Fairooz (@Ahmed_Fairoox) December 4, 2021
\
މާއިޒުގެ ވާހަކައިގައި މާދަން ކަންވާނެ ގޮތް އެކަށްވެސް ނޭނގޭނެ ކަމާއި މާދަމާ ނުކުޅެދުންތެރިކަމާ ކޮންމެ މީހަކަށްވެސް ކުރިމަތިލާން ޖެހިދާނެ ކަމަށް ބުނެ އެވެ. އަދި އެދުވަހަކުން މިއަދު އެފަދަ ކުދިންނާއި މީހުން އެކުރާ އިހްސާސް ކުރަންޖެހޭނެ ކަން ހަނދާންކޮށްދެ އެވެ.
"ތިޔަ ބޭފުޅުންނަށް މާތްﷲ ވަނީ ވަރަށް ބޮޑު ނިއުމަތެއް ދެއްވާފައި. އެއީ ހެޔޮގޮތުގައި ތި ބޭފުޅުން އަޅުގަނޑުމެނަށް ހިދުމަތްކުރުން. އެ ފުރުސަތު ހެޔޮގޮތުގައި ބޭނުންކޮށްފި ނަމަ މާތްﷲގެ ވާގިފުޅާއެކު، ތިޔަ ބޭފުޅުން މި ގޮނޑީގައި އިންނަން ޖެހޭދުވަހު ތި ބޭފުޅުންނަށްވެސް ލޮތްބާ އޯގާތެރިކަމާއި އަޅާލުމާއި ފިރުމުންތައް އިތުރުވެގެންދާނެ."
މާއިޒުގެ ކޮންމެ ޖުމްލައަކުން އެ އަޑުއަހަން ތިބި މީހުނަށް ފުން އަސަރެއްކުރުވަ އެވެ. އަދިވެސް ނުކުޅެދުންތެރިކަން ހުންނަ ކުދިންނަށް އަޅާލުމާއި އެހީތެރިކަން ބޭނުންވާ މިންވަރު ފާހަގަވެ އެވެ. އެންމެ ހާއްސަ އެއް ކަމަކަށް ސްކޫލުތަކާއި މިސްކިތްތަކަށް އެ ފަދަ ކުދިންނަށް ގޮސް އުޅުމަށް ދަތިތައް ހުރި ވާޙަކަ އަޑުއިވުމަކީ މީހުން ފެންކަޅިވެގެންދިޔަ ވާހަކަތަކެކެވެ.
"އަޅުގަނޑުމެނަކީވެސް މުސްލިމުން. އަޅުގަނޑުމެންވެސް ބޭނުން މިސްކިތައްގޮސް ނަމާދުކުރެވޭނެ ގޮތް ހުންނަން. އެކަމު ހިތާމައާއެކު ފާޙަގަކުރާ ކަމަކީ މަދު ރަށެއްގައި މެނުވީ މިފަދަ ކުދިންނަށް މިފަދަ އިންތިޒާމްކޮށްފައިނުވާކަން. އަޅުގަނޑުމެންގެ އުއްމީދަކީ އަދި އަޅުގަނޑުމެންގެ އެދުމަކީ މި ފަދަ ފުރުސަތުތައް ލިބުން،" މާއިޒް ހިތާމައާއެކު ފާހަގަކުރި އެވެ.
އިންސާނަށް އެންމެ ބޭނުންވަނީ ލޮތްބާއި އޯގާތެރިކަން ކަމަށާއި މާއިޒްގެ ހަޔާތުގައި ރެއަކީ އެންމެ އުފާވެރި އެއް ދުވަސްކަން އޭނާގެ ވާހަކައިގައި ފާހަގަކުރި އެވެ. އަދި ނުކުޅުދުންތެރިކަން މީހުނަށް ހާއްސަ އެވޯޑެއް ދީ އެފަދަ ދުވަހެއް ފާހަގަކުރުމަކީ އެކަމާ އުފާކުރާ ކަމެއްކަންވެސް މާއިޒުގެ ވާހަކައިން ބުނެދެ އެވެ.
އެ ވާހަކަތަކުން ދައުލަތުގެ އެންމެ މަތީވެރިޔާ ރައީސް އިބްރާހިމް މުހައްމަދު ސޯލިހަށް ފުން އަސަރުކުރުވާފައިވާފައިވާ މަންޒަރު ފެނެ އެވެ. އަދި މާއިޒުގެ އެ ވާހަކަ ނިމުމާއެކު ރައީސް ސޯލިހް ސްޓޭޖަށް އަރާވަޑައިގެން މާއިޒުގެ ކަންފަތްދޮށުގައި އޯގާތެރިކަމާއެކު ކޮންމެވެސް އެއްޗެއް ވިދާޅުވެ އެވެ. އެ ޖަލްސާގައި އެ ވަގުތު ތިބި އެންމެން ފެންކަޅިވެ އެ ޖަލްސާއަޑު އަހަމުންދިޔައިރު މާއިޒު އޭނާގެ މަންމަ އާއި ބައްޕަ ޝުކުރު އަދާކުރި ރީތިސިފަ އަކީވެސް އެހާމެ ޝައުގުވެރި ވަގުތުކޮޅެކެވެ. ރޭ މާއިޒު ދެއްކި އެ ވާހަކަ މުޅި ސޯޝަލް މީޑިޔާގައި ދަނީ ދައުރުވަމުންނެވެ.