ސްރީލަންކަން މެދުވެރިކޮށް ގަމާއި، އިންޑިއާ އާއި ދެމެދު އަދި ދަތުރުފެށެން ނެތް ކަމަށް އޭސް އޭވިއޭޝަންގެ މެނޭޖިން ޑިރެކްޓަރ މުހައްމަދު ފިރާޤު ވިދަޅުވެއްޖެއެވެ.
ކޮވިޑާއި ގުޅިގެން ސްރީލަންކަން އިން ސ. ގަމަށް ކުރަމުން ދިޔަ ދަތުރުތައް މެދުކަނޑާލުމަށް ފަހު މި މަހުގެ 4 ވަނަ ދުވަު އަލުން ވަނީ ދަތުރު ފަށާފައެވެ. އެގޮތުން ގަމާއި ކޮލަމްބޯ އާއި ދެމެދު ހަފްތާއަކު އެއް ފްލައިޓި ބޭއްވުމަށް މިހާރު ވަނީ ނިންމާފައެއެވެ.
ގަމަށް ސްރީލަންކަންގެ ދަތުރު ފެށުމަށް ބޭއްވި ރަސްމިއްޔާތުގައި އައްޑޫލައިވްއިން ކުރި ސުވާލަކަށް ޖަވާބު ދެއްވަމުން ފިރާގު ވިދާޅުވީ ކޮވިޑާއި ގުޅިގެން ގައުމުތަކަށް ދަތުރު ކުރަނީ ވަކި ހާއްސަ އުސޫލެއްގެ ތެރެއިން ކަމަށެވެ. އެގޮތުން އެއް ގައުމު އަނެއް ގަމުމަށް ތަރުކުރުމަށް ރެސްތްރިކްޝަން މިހާރު އެބަހުރި ކަމަށެވެ.
"އެއް ގައުމު އަނެއް ގައުމަށް ހެދިފައި ހުންނަ އެއާ ބަބްލްތަކެއްގެ ސަބަބުން އަޅުގަނޑުމެންނަކަށް ސީދާ ގަމުން ނަގައިގެން ސިލޯން (ސްރީލަންކާ) މެދުވެރިކޮށް އިންޑިއާއަށް ގެންދިއުމުގައި އެބަހުރި ދަތިތަކެއް، އެހެންވީމާ އަޅުގަނޑުމެން މި ޖެހެނީ ސްރީލަންކާގައި އޯވާނައިޓުކޮށްފައި އެއްރޭ ހުރެފައި ފޮނުވީމާ އަގުވެސް އެބަބޮޑުވޭ، ދެން އެހެން ނަމަވެސް މިވަގުތަށް އޮތް ހައްލަކީ އެއީ، އެހެން ނަމަވެސް ގަބޫލް ކުރާ ގޮތުގައި ސަރުކާރުތަކުންވެސް އަދި ދަތުރުފަތުރަށް ޕެޓަންއަށް އަންނަ ބަދަލެއްގެ ސަބަބުން މިކަން ފަސޭހަވެގެންދާނެ، މިހާރުވެސް އަޅުގަނޑުމެންނަށް ކަނެކްޝަން ލިބޭނެ، އެހެންނަމަވެސް މިދެންނެވި ސަބަބާއި ހުރެ އަޅުގަނޑުމެންނަށް އިމީޑިއެޓު ކަނެކްޝަން ނުދެވެނީ، އިމީޑިއެޓު ނުދެވޭ ސަބަބކީ ރެސްޓްރިކްޝަން ހުރީމަ" ފިރާގު ވިދާޅުވިއެވެ.
ފިރާގު ވިދާޅުވީ މިހާރު ހަމަޖެހިފައި އޮތް އުސޫލުން ދަތުރުކުރާނަމަ އެމީހަކު އެއްރޭ ލަންކާގައި މަޑު ކުރަންޖެހޭނެކަމަށެވެ. އަދި އެއީ އިތުރު ހަރަދެއްކަމަށެވެ. އަދި ލަންކާއިން އިންޑިއާއަށް ދަތުރު ކުރަންޖެހޭނީ ވަކި ޓިކެޓެއްގައި ކަމަށެވެ. ނަމަވެސް މި އުސޫލަށް އަވަސް ބަދަލުތަކެއް އައުން އެކަށީގެންވާ ކަމަށެވެ.
"ރާއްޖެ މިއިންނަނީ ވަކި ޓްރެވަލް ބަބްލްއެއްގައި، އިންޑިއާ އާއި އެކީގައި، އަދި ސްރީލަންކާ އައި އެކީވެސް ޓްރެވެލް ބަބްލްއެއް އެހެންވީމާ ވާގޮތަލީ އަޅުގަނޑުމެންނަށް ނޯވޭ ސްރީލަންކާ ބައެއްގެ ގޮތުގައި އަޅުގަނޑުމެންނަށް ދެވޭނެ ކަހަލަ އިންތިޒާމެއް އަދި ަމަޖެހިފައި ނެތް، މި ޖެހެނީ އެމީހަކު އެކޮޅުގައި އެއްރޭ ސްޓޭކޮށް އާ ޓިކެޓެއްގައި ދަތުރު ކުރަން ފިރާގު ވިދާޅުވިއެވެ.
ސްރީލަންކަންގެ ދަތުރުތައް ހުއްޓާލިއިރު ގަމުން ލަންކާގެ އިތުރުން، ބެންކޮކް، މެލޭޝިއާ އަދި އިންޑީއާގެ ކޮޗިން އަދި ޓްރެވިންޑްރަމަށް ދަތުރު ކުރެވއެެވެ.
ސްރީލަންކަންއިން ބުނީ ދަތުރު ފަށާއިރު އަމާޒަކީ ދުވާލަކު ފްލައިޓެއް ގަމުން ކޮލަމްބޯއަށް ބޭއްވުމެވެ. އަދި ދަތުރު ފަށަނީ ލ އަތޮޅު ހިމެނޭ ހެން ހުވަދޫ، އަދި ފުވައްމުކުން ދަތުރު ކުރާ ފަރާތްތްތަކަށްވެސް ލުއި ގޮތަކަށް ދަތުރު ކުރެވޭނެގޮތަށް މޯލްޑިވިއަން މެދުވެރިކޮށް ކަނެކްޝަން ލިބޭނެ އިންތިޒާމް ހަމަޖެހިގެންދާނެ ކަމުގެ އުއްމީދާއި އެކު ކަމަށެވެ.