އަތޮޅުގެ ރަށްތަކުގެމެދުގައި ކޮންމެ އަހަރަކު ބާއްވަމުން އަންނަ ގުުރްއާން މުބާރާތަކީ ވާދަވެރި އަދި ސްކޫލްތަކުގެ މެދުގައި ޝައުގުވެރި މުބާރާތެކެވެ. ގައުމީ މުބާރާތުގައި ވާދަކުރާނެ ދަރިވަރުން ހޮވިގެންދާ މި މުބާރާތުގައި މި އަހަރަކީ މ.ދިއްގަރަށް ހާއްސަ އަހަރެކެވެ.
މިއަހަރުގެ މ. އަތޮޅު ގުރާއާން މުބާރާތުން އެއްވަނަ ސްކޫލަކަށް ހޮވުނީ ދިއްގަރު ސްކޫލެވެ. އެންމެ ހާއްސަ ކަމަކީ މި އަހަރުގެ މި މުބާރާތާއެކު މިއީ އެ ސްކޫލުން މި ވަނަ ހޯދި 23 ވަނަ ފަހަރެވެ. އެނގޭގޮތުގައި އަތޮޅު މިއީ މުބާރާތް ބާއްވާތާ މިއީ 25 ވަނަ އަހަރެވެ.
އެހެން ކަމުން ދިއްގަރަށް އެއްވަނަ ގެއްލިގެން ދިޔަޢީ 25 އަހަރުގެ ތެރޭގައި ދެ އަހަރެވެ. އެހެން ކަމުން މިއީ މަދު ސްކޫލަކަށް ނޫނީ އަތޮޅު ފެންވަރުގައި ނުލިބޭނެ ފަދަ ފަހްރެކެވެ. އެކަމާމެދު ފަހްރުވެރިނުވާ ހަމަ އެކަކުވެސް އެ ރަށުގައި ނެތެވެ.
އަތޮޅު މުބާރާތުގައި ދިއްގަރު ސްކޫލުގެ ދަރިވަރުން މުޅި މުބާރާތުން ހޯދި ފާހަގަކޮށްލެވޭ ބައެއް ވަނަތައް:
– 15 އަހަރުން ދަށުން ނުބަލާ ކިޔުމުގެ ބައިން މުޅި މުބަރާތުން 3 ވަނަ
– 9 އަހަރުން ދަށުން ބަލައިގެން ކިޔުމުގެ ބައިން މުޅި މުބަރާތުން 1 ވަނަ
– 12 އަހަރުން ދަށުން ބަލައިގެން ކިޔުމުގެ ބައިން މުޅި މުބަރާތުން 1 ވަނަ
– 9 އަހަރުން ދަށުން ބަލައިގެން ކިޔުމުގެ ބައިން މުޅި މުބަރާތުން 2 ވަނަ
– 15 އަހަރުން ދަށުން ބަލައިގެން ކިޔުމުގެ ބައިން މުޅި މުބަރާތުން 3 ވަނަ
މީގެ އިތުރުންވެސް މިިއަހަރުގެ މުބާރާތުގައި ބައިވެރި ދަރިވަރުންގެ ތެރެއިން އެންމެ މޮޅު 10 ދަރިވަރުންނާއި އެންމެ މޮޅު 20 ދަރިވަރުންގެ ތެރޭގައި ދިއްގަރު ސްކޫލުގެ ގިނަ ދަރިވަރުން ހޯދި އެވެ.
ރަން ވަނަތަކާއެކު އިއްޔެ އެ ދަރިވަރުން ދިއްގަރަށް ދިއުމުން ރަތް ދޫލައިން އެކުދިންނަށް ކީ ހޫނު މަރުހަބާއިން ރަށަށް ލިބުނު ފަހަރާމެދު ރައްޔިތުންގެ ހިތުގައި އުފެދިފައިވާ ޝުއޫރު މާ ރަނގަޅަށްވެސް ސާފުވެ އެވެ. މިކަމުގެ އެންމެ ބޮޑު އުފަލެއް ދަރިވަރުންނާއި ބެލެވެރިންނާއި ޓީޗަރުންނާ އެއްވަރަށް ކައުންސިލްގެ ރައީސް އިހްސާސްކުރެ އެވެ.
" މިލިބުނު ކާމިޔާބީ އަށް މާތް ﷲ އަށް ޙަމްދުކުރަން. މި ކާމިޔާބީ ރަމްޒުކޮށްދެނީ ދިއްގަރު ރައްޔިތުންގެ މެދުގައި ޒަމާނުއްސުރެ ޤުރުއާނަށް އޮތް ލޯތްބާއި އިޙްތިރާމް. މި ކާމިޔާބީއަކީ ޤުރުއާން މުދައްރިސުނާއި، ދަރިވަރުންނާއި، ބެލެނިވެރިންގެ މިންނެތް މަސައްކަތުން ލިބުނު ކާމިޔާބީއެއް. މިފުރުޞަތުގައި ދިއްގަރު ސްކޫލްގެ ހީވާގި މުދައްރިސުންނާއި، ލޮބުވެތި ދަރިވަރުންނާއި، ބެލެނިވެރިންނަށް މަރުޙަބާ އާއި ޝުކުރު އަރިސްކުރަން" ދިއްގަރު ކައުންސިލްގެ ރައީސް އަހްމަދު ނިޝާން އައްޑޫ ލައިވްއަށް ވިދާޅުވި އެވެ.
ދިއްގަރުގެ މި ފަހްރު ދެމެހެއްޓުމަށްޓަކައި ކައުންސިލާއި ރަށު ރައްޔިތަކު ބޭނުންވާނެ އެވެ. އެކަމަށް ޓަކައި ކުރަންޖެހޭ މަސައްކަތްވެސް ބޮޑެވެ. ނިޝާންގެ ވިދާޅުވި ގޮތުގައި ރަށުގައި ޙާފިޟުން އުފެއްދުމަށް ކުރިއަށް އޮތްތާގައި މަސައްކަތްތަކެއް ކުރެވިގެންދާނެ އެވެ.
"ކައުންސިލްގެ އަމާޒަކީ ދިއްގަރުގެ މިތާރީޚީ ކާމިޔާބީއާއި އެކު މިރަށަކީ ޤުރުއާނުގެ ޢިލްމުން ކުރިއަރާފައި ތިބި ދަރިންތަކެއް ތިބި ރަށަކަށް ހެދުން. އެގޮތުން ކުރިޔަށް އޮތް 5 އަހަރުގެ ތެރޭގައި ޙާފިޟުން އުފެއްދުމަށް ގިނަ މަސައްކަތްތަކެއް ކުރެވިގެން ދާނެ" ނިޝާން ވިދާޅުވި އެވެ.