ގައުމީ ފެންވަރުގައި މި އަހަރު މަސްވެރިންގެ ދުވަސް ފާހަގަކުރުމަށް ސަރުކާރުން ހިންގާ ހަރަކާތްތައް ޝަރަފުކޮށްދެއްވުމަށް ރައީސް އިބްރާހިމް މުހައްމަދު ސޯލިހާއި ނައިބު ރައީސް ފައިސަލް ނަސީމް މާދަމާ ކ.ގާފަރަށް ވަޑައިގަންނަވާ ގޮތައް ހަމަޖެހިއްޖެ އެވެ.
މާދަމާއަކީ ގައުމީ ފެންވަރެއްގައި މަސްވެރިންގެ ދުވަސް ފާހަގަކުރާތާ 41 ވަނަ އަހަރެވެ. މި ދުވަސް މިއަހަރު ކ.ގާފަރުގައި ފާހަގަކުރަން ސަރުކާރުން ނިންމުމާއެކު ރަށް ވަނީ އެކަމަށް ވަރަށް ބޮޑަށް ތައްޔާރުވެފަ އެވެ. އެންމެ ހާއްސަ ކަމަކަށް އޮންނާނާނީ މާދަމާ ރޭ އެރަށުގައި ބާއްވާ ރަސްމީ ބޮޑު ޖަލްސާ އެވެ. މި ޖަލްސާގައި ރައީސް ސޯލިހް ވާހަކަފުޅު ދައްކަވާނެ އެވެ.
މީގެ އިތުރުން އެރަށުގައި އިންޑިޔާ ސަރުކާރުގެ އެހީގައި ގާއިމުކޮށްފައިވާ އައިސްޕްލާންޓް ރަސްމީކޮށް ހުޅުވުމަށް ވަނީ ހަމަޖެހިފަ އެވެ. ހަމައެހެންމެ ސަރުކާރުން ގާފަރަށް ކުރާ މި ދަތުރުގެ ތެރެއިން އެރަށުގައި ފުލުހުންގެ ހިދުމަތްވެސް ދޭން ފެށުމަށް ހަމަޖެހިފައިވެ އެވެ.
މަސްވެރިންގެ ދުވަހުގެ ހަރަކާތްތަކުގައި ބައިވެރިވުމަށް ސަރުކާރުގެ މަސްކުންޏާއި ސަރުކާރުގެ އެހެން އިސް ފަރާތްތަކުން މިހާރުވެސް ވަނީ އެރަށް ވަޑައިގެންފަ އެވެ.
މަސްވެރިން ދުވަހާއި އެހެނިހެން ހަރަކާތްތައް:
މަސްވެރިންގެ ފޯރަމް
މަސްކެނޑުމުގެ މުބާރާތް
ފަރުމަސްވެރިކަމުގެ މުބާރާތް
އައިސްޕްލާންޓް ހިދުމަތް ފެށުން
ފުލުހުންގެ ހިދުމަތްފެށުން
ރަށުގައިހުރި ސަަރުކާރުގެ ހުރިހާ އޮފީސްތަކާއި ސްކޫލާއި ބަނދަރުމަތި ވަނީ މި ދުވަހަށް ވަރަށް ޒީނަތްތެރިކޮށްފަ އެވެ.