ސ.އަތޮޅު މަދަރުސާ އަދި އިރުޝާދިއްޔާ ސްކޫލުގައި އިތުރު ކްލާސްރޫމުތަކެއް އަޅަން ބަޔަކާ ހަވާލުކޮށްފި އެވެ.
މި މަސައްކަތް ކުރުމަށް ހަވާލުކޮށްފައިވަނީ ވެންޒާ ކޮމްޕެނީ ޕްރައިވެޓް ލިމިޓެޑާ އެވެ.
އައްޑޫ ސިޓީ ހުޅުދޫ އަދި މީދޫ އަވަށުގައި ހުރި ސ.އަތޮޅު މަދަރުސާގައި އިތުރު 6 ކްލާސްރޫމު އަޅަން ވަނީ ނިންމާފައެވެ. މިކަމަށް 6،774،644.59 ރުފިޔާ ހަރަދު ކުރުމަށް ނިންމާފައިވާއިރު، އެ ސްކޫލަކީ ކްލާސްރޫމުގެ ދަތިކަން ހުރި ސްކޫލެއްކަން ފާހަގަކޮށްލެވެއެވެ. މީގެއިތުރުން، މަރަދޫ-މަރަދޫފޭދޫ އަވަށުގައި ހުރި އިރުޝާދިއްޔާ ސްކޫލުގެ 12 ކްލާސްރޫމް، ލެބް އަދި އޮފީސް އިމާރާތުގެ މަޝްރޫޢަށް 15،063،088.53 ރުފިޔާ ޚަރަދުކުރަންވެސް ވަނީ ނިންމާފައެވެ.
މި މަޝްރޫއުގެ މަސައްކަތްކުރުމުގެ އެގްރިމެންޓުގައި ވެންޒާ ޕްރައިވެޓް ލިމިޓެޑާއެކު ސޮއި ކޮށްފައިވާއިރު، 21 މިލިއަނަށްވުރެ ގިނަ ރުފިޔާ މި 2 މަޝްރޫއަށް ހޭދަވާނެއެވެ.
ސްކޫލްތަކުގައި ހުރި ޖާގައިގެ ދަތިކަން ހައްލުކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. ސްކޫލްތަކުގެ ކިޔެވުން އެއް ދަންފަޅިއަކަށް ބަދަލުކުރުމަކީ މި ސަރުކާރުގެ ތަސައްވުރުގެ ތެރޭގައި ހިމެނޭ ކަމެކެވެ.