އައްޑޫ ސިޓީގެ މީދޫ އަވަށުގައި މިސްކިތެއް ބިނާކުރުމަށް ބީލަން ހުށަހެޅުމުގެ ފުރުސަތު ހުޅުވާލައިފި އެވެ.
ފިނޭންސް މިނިސްޓްރީން ކޮށްފައިވާ އިއުލާނެއްގައި ވާގޮތުން، މިނިސްޓްރީ އޮފް އިސްލާމިކް އެފެއާރޒްގެ އެދިލެއްވުމުގެ މަތިން އެ މަސައްކަތް ކޮށްދޭނެ ފަރާތެއް ހޯދަން ބޭނުންވެއެވެ. އެގޮތުން ބިޑް ސެކިއުރިޓީގެ ގޮތުގައި 45،000 ރުފިޔާ މި މަސައްކަތަށް ވަނީ ހިމަނާފައެވެ. އަދި ކޮންމެ ބީލަމެއްގައި ބައިވެރިވުމަށް 500 ރުފިޔާގެ ނޮން-ރިފަންޑަބަލް ރަޖިސްޓްރޭޝަން ފީއެއް ދައްކަންޖެހޭނެ ކަމަށްވެސް އެ އިއުލާނުގައި ވެއެވެ.
މި ބީލަމުގައި ބައިވެރިވެވޭނީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ "ޢިމާރާތްކުރުމުގެ ޢަމަލީ މަސައްކަތްކުރާފަރާތްތަކުގެ ގަވާއިދު" ގައިވާ ގޮތުގެމަތީން ރަޖިސްޓަރީވެފައިވާ ފަރާތްތަކަށް އެކަނި ކަމަށް، ފިނޭންސް މިނިސްޓްރީން ބުނެއެވެ. އަދި މި ބީލަމާއި ގުޅިގެން ދޫކުރެވޭ އެންމެފަހުގެ މަޢުލޫމާތުތަށް ވެބްސައިޓް މެދުވެރިކޮށް ހޯދުމަކީ ބީލަމަށް ކުރިމަތިލާ ފަރާތުގެ ޒިންމާއެއް ކަމަށްވެސް އެ އިއުލާނުގައި ވެއެވެ.
ނޮން-ރިފަންޑަބަލް ރަޖިސްޓްރޭޝަން ފީއަށް ވާ ފައިސާ ބަލައިގަންނަން ހަމަޖެހިފައިވަނީ 06 ޑިސެންބަރު 2021 އިން 23 ޑިސެންބަރު 2021 ގެ ނިޔަލަށް ބަނޑޭރި ޕޭ ޕޯޓަލް މެދުވެރިކޮށެވެ. އަދި ބީލަން ހުޅުވުން އޮންނާނީ 28 ޑިސެންބަރު 2021 ވާ އަންގާރަ ދުވަހުގެ 11:00 ގައި ފިނޭންސް މިނިސްޓްރީގެ ނެޝަނަލް ޓެންޑަރގެ ޖަލްސާކުރާ މާލަމުގައެވެ. ބީލަންތައް ހުންނަންވާނީ ސިޓީއުރައެއްގައި ބަންދުކުރެވިފައި ކަމަށާއި، ބޭރުގައި ބީލަމަށް ދެވިފައިވާ ނަން، ހުޅުވަން ކަނޑައެޅިފައިވާ ތާރީޚާއި ވަޤުތު އަދި ބީލަން ހުށަހަޅާ ފަރާތުގެ ނަން ލިޔެވިފައި އޮންނަންވާނެ ކަމަށް، އެ މިނިސްޓްރީގެ އިއުލާނުގައި ވެއެވެ.
އައްޑޫ ސިޓީ މީދޫ އަވަށުގައި މިސްކިތެއް ބިނާކުރަން ނިންމާފައިވާއިރު، މި މިސްކިތް ބިނާކުރަން ހަމަޖެހިފައިވަނީ މިހާރު މަސްޖިދުލް އިބްރާހިމް މަޖުދުއްދީން (މީދޫ ރާވެރިން މިސްކިތް) ހުރި ބިމުގައެވެ.
ފިނޭންސް މިނިސްޓްރީގެ އިއުލާނާ ގުޅޭ އިތުރު މައުލޫމާތު މި ޖުމުލައަށް ފިތާލުމުން ލިބިލައްވާނެއެވެ.