މި ސަރުކާރަކީ ޒުވާނުންގެ ސަރުކާރެއް ކަމަށާއި ޒުވާނުންގެ ކުރިއެރުމާއި ތަރައްގީ އަށް އަދި އައްޑޫގެ ޒުވާނުންގެ އަމާޒުކޮށްގެން މި އަހަރުގެ ތެރޭގައި ކުޅިވަރު އެރީނާތަކާއި ކޮމްޕްލެކްސްތައް ހެދިގެން ދާނެ ކަމަށް ރައީސް އަބްދުﷲ ޔާމީން ވިދާޅުވެއްޖެ އެވެ.
ރޭ އައްޑޫގައި ވާހަކަ ދައްކަވަމުން ރައީސް ވިދާޅުވީ އައްޑޫގެ ދެ ރަށް ފިޔަވައި އެހެން ހުރިހާ ރަށެއްގައި ސްޕޯޓްސް އެރީނާތައް ހަދާނެ ކަމަށެވެ. އަދި އެއީ ދެ ޖިންސްގެ ޒުވާނުންނަށް ހުރިހާ ވައްތަރެއްގެ ކުޅިވަރުތަކެއް ކުޅެވޭނެ އިންތިޒާމުތަކާއި ވަސީލްތައް ގާއިމު ކުރެވިފައިވާ ތަންތަނަށް ވާނެ ކަމަށް ވިދާޅުވި އެވެ.
އަދި އައްޑޫގެ އެންމެ އާބާދީ ކުޑަ ދެ ރަށް ކަމަށްވާ މީދު އާއި މަރަދޫފޭދޫގައި ސްޕޯޓްސް ކޮމްޕްލެކްސްތަކެއް ގާއިމިު ކުރައްވާނެ ކަމަށް ވިދާޅުވި އެވެ.
ރައީސް ވިދާޅުވީ ބޭނުން ވަނީ ޒުވާނުންނަށް ވަޒީފާގެ ފުރުސަތުތަކާއި މުނިފޫހި ފިލުވޭނެ ގޮތްތައް ހޯދައިދީ، ޒުވާނުންނަށް ކުރިއަށް ދެވޭނެ ގޮތްތައް ހޯދައި ދިނުން ކަމަށެވެ.
އެގޮތުން ކުދިކުދި ކުށުގެ ރެކޯޑްތައް އޮންނަ ޒުވާނުންގެ ކުށުގެ ރެކޯޑް ސާފުކޮށްދީ، އެފަދަ ޒުވާނުން ޒިންމާރު މަސައްކަތްތަކަށް ނިކުމެވޭނެ ގޮތްތައް ހޯދައިދީ ކުށުގެ މާހައުލުން ސަލާމަތް ކުރަން މަސައްކަތް ކުރައްވާނެ ކަމަށް ރައީސް ވިދާޅުވި އެވެ./