ގެސްޓް ހައުސްއަކުން ވައްކަންކޮށްގެން ހައްޔަރު

ސ. ހިތަދޫ ގެސްޓް ހައުސްއަކުން ވަގަށް ނަގާފައިވާ ގިނަ ޢަދަދެއްގެ ތަކެތި ހޯދައި ތުހުމަތު ކުރެވޭ މީހަކު ހައްޔަރުކޮށްފި އެވެ.

މި މައްސަލާގައި ހައްޔަރުކޮށްފައި ވަނީ 24 އަހަރުގެ ފިރިހެނެކެވެ. އޭނާ އަކީ ވައްކަމާއި މަސްތުވާތަކެތީގެ މައްސަލަތަކުގެ ރެކޯޑްތައް އޮންނަ މީހެއް ކަމަށް ފުލުހުން ބުންޏެވެ.

މި މަހުގެ 14 ވަނަ ހަވީރުގެ ވަގުތެއްގައިހިތަދޫގައި ހުންނަ ގެސްޓް ހައުސްއަކުން ގިނަ ޢަދަދެއްގެ ތަކެތި ވަގަށް ނަގާފައިވާ ކަމަށް ފުލުހުންނަށް ހުށަހެޅުނު މައްސަލަ އާ ގުޅިގެން 24 އަހަރުގެ މީހާ ހައްޔަރުކޮށްފަ އިވަނީ އެ ދުވަހުގެ ރޭ 21:20 ހާއިރު އެވެ.

ގެސްޓް ހައުސް އިން ވަގަށް ނަގާފައިވާތަކެތި ހޯދާފައި ވަނީ ހިތަދޫ ފަޅު ގޯއްޗެއްގެ ތެރޭގައި ހުރި ރާނބާފަތް ގަސްތަކެއްގެ ތެރޭގައި އޮތް ދަބަހެއްގެ ތެރެއިންނެވެ.

އެގޮތުން އެ ގެސްޓް ހައުސްއިން ވަގަށް ނަގާފައިވާ ތަކެތީގެ ތެރޭގައި ހިމެނޭ ފައިސާ ފިޔަވައި އެހެން ހުރިހާ ތަކެތި ފުލުހުން ވަނީ ހޯދާފައެވެ. މި ފައިސާތައް ހޯދުމުގެ މަސައްކަތް ފުލުހުން ދަނީ ކުރަމުންނެވެ.

މި މައްސަލާގައި ހައްޔަރުކޮށްފައިވާ މީހާގެ ބަންދާ މެދު ގޮތެއް ނިންމުމަށްޓަކައި ހިތަދޫ މެޖިސްޓްރޭޓް ކޯޓަށް ހާޒިރު ކުރުމުން ވަނީ 15 ދުވަހުގެ މުއްދަތެއް ދީފަ އެވެ.