އިންޑޮނޭޝިއާގެ ފްލޯރެސް އައިލެންޑް ކައިރިން 7.3 މެގްނިޓިއުޑުގެ ބާރުމިނުގައި ބިންހެލުމެއް އަތުވެއްޖެ އެވެ.
ޔޫއެސް ޖިއޮލޮޖިކަލް ސާވޭ އިން ބުނީ މިއަދު ހެނދުނު އިންޑޮނޭޝިއާގެ ގަޑިން 10:20 ގައި އެ ބިންހެލުން އައީ ފްލޯރެސް ކަނޑުގެ 18.5 ކިލޯމީޓަރު އަޑިއަށް ކަމަށެވެ. އަދި މި ބިންހެލުމަށް ފަހު 5.6 މެގްނިޓިއުޑްގެ އާފްޓާޝޮކެއް ވެސް އައިކަމަށް އެ އިދާރާއިން ވަނީ ބުނެފައެވެ.
މި ބިންހެލުމާ ގުޅިގެން އެމެރިކާގެ ޕެސިފިކް ސުނާމީ ވޯނިން ސެންޓަރުން ވަނީ، 1،000 ކިލޯމީޓަރުގެ ސަރަހައްދަކަށް ސުނާމީ އަރާފާނެ ކަމުގެ އިންޒާރު ދީފައެވެ. ނަމަވެސް ދިވެހިރާއްޖޭގެ މޫސުމާ ބެހޭ ގައުމީ އިދާރާއިން ވަނީ އެ ބިންހެލުމުގެ އަސަރު ރާއްޖެއަށް ކުރާނެ ކަމަށް ލަފާ ނުކުރެވޭ ކަމަށް ބުނެފައެވެ.
އިންޑޮނޭޝިއާ އަކީ ބިންހެލުންތައް ގިނައިން އަންނަ ގައުމެކެވެ. އަދި ބިންހެލުމަށްފަހު ސުނާމީގެ ސަބަބުން އެ ގައުމަށް ގިނަ ގެއްލުންތައް ކުރިމަތިވެއެވެ.