ކޮމަންޑޫ ދާއިރާގެ މެމްބަރު އަވަހާރަވުމާއެކު، އެ ދާއިރާގެ ބައި އިލެކްޝަން ބާއްވަން އިލެކްޝަންސް ކޮމިޝަނުން ނިންމައިފި އެވެ.
ކޮމަންޑޫ ދާއިރާގެ މެމްބަރު ހުސައިން ވަހީދު އަވަހާރަވުމާ ގުޅިގެން އެ ދާއިރާގެ ގޮނޑި ވަނީ ހުސްވެފައެވެ.
އިލެކްޝަންސް ކޮމިޝަނުގެ ރައީސް ފުއާދު ތައުފީގު ވިދާޅުވީ، މެމްބަރު ހުސައިން އަވަހާރަވިކަމުގެ ލިޔުންތައް ހޯދަން މަސައްކަތް ފަށާފައިވާ ކަމަށާއި، ބައި އިލެކްޝަން ބާއްވާނެ ތާރީޚެއް ދަންނަވަން އަދި ދަތި ކަމަށެވެ.
ރައްޔިތުންގެ މަޖިލީހުގެ ގާނޫނުގައި އޮންނަ ގޮތުންނަމަ، ގޮނޑިއެއް ހުސްވެއްޖެނަމަ، ދެ މަސް ދުވަސް ތެރޭގައި ބައި އިލެކްޝަން ބާއްވަން ޖެހޭނެއެވެ. ފުއާދު ވަނީ، ގާނޫނު ބުނާ މުއްދަތުގެ ތެރޭގައި އިންތިހާބު އޮންނާނެކަމަށް ވިދާޅުވެފައެވެ.
ކޮމަންޑޫ ދާއިރާގެ މެމްބަރު ހުސައިން ވަހީދު ވަނީ ރޭގެ ވަގުތެއްގައި އަވަހާރަވެފައެވެ. މެމްބަރު ވަހީދު އަވަހާރަވީ، ކެންސަރަށް ފަރުވާ ހޯއްދަވަމުން ގެންދަވަނިކޮށް އޭޑީކޭ ހޮސްޕިޓަލުގައެވެ. އަވަހާރަވިއިރު މެމްބަރު ވަހީދުގެ އުމުރުފުޅަކީ 53 އަހަރެވެ.