ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ބޮމެއް ގޮއްވާލި މައްސަލައިގައި، އަހްމަދު އަދުހަމް ރަޝީދު 23 އަހަރާއި 6 މަހާއި 9 ނުވަ ދުވަހަށް ޖަލަށް ލާން ކްރިމިނަލް ކޯޓުން ހުކުމްކޮށްފިއެވެ.
މި އަހަރުގެ މެއި މަހު ރައީސް ނަޝީދަށްއިން ޓެރަރިސްޓް ހަމަލާގައި އަމަލީގޮތުން ބައިވެރިވި އަދްހަމްގެ މައްޗަށް ކުށް ސާބިތުވީ އޭނާ ކުށަށްވި އިއުތިރާފާއެކު އެވެ.
ގ. ކެނެރީގެ ކައިރީގައި ސައިކަލެއްގައިި އެއްޗެއް ގޮއްވާލައިގެން ދިން ހަމަލާ އާގުޅިގެން ދައުލަތުން ހަތަރު ދައުވާއެއް އަދްހަމްގެ މައްޗަށް ކުރި އެވެ. އޭނާގެ މައްޗަށް ކުރި ތުހްމަތުތަކާ ގުޅިގެން ތަހްގީގުމަރުހަލާގައި އަދްހަމް ދައުލަތާ އެކު ހެދި އިއުތިރާފު އެއްބަސްވުމެއްގެ ދަށުން އޭނާ ވަނީ ކޯޓުގައި ކުށަށް އިއުތިރާފްވެފަ އެވެ.
އަދްހަމް ވަނީއެ އެ ހަމަލާގައި ނަޝީދާއި އިތުރު ބަޔަކަށް އަނިޔާ ވެފައިވާތީ ނަޝީދާއި އަނިޔާ ލިބުނު އެންމެންގެ ކިބައިން ކޯޓުގައި މާފަށް އެދިފަ އެވެ. އޭނާ ބުނީ ނަޝީދަށް ހަމަލާދިނުމުގައި ބައިވެރިވެވުނީ ދީނީ ގޮތުން ގަބޫލު ކުރެވުނު ކަންތައްތަކެއްގެ ސަބަބުން ކަމަށެވެ.
އަމިއްލައަށް ތައްޔާރުކޮށްފައިވާ ގޮވާއެތިން ނަޝީދާއި އިތުރު ބަޔަކު މަރުން ސަލާމްތްވީ ހަމަކިރިޔާ އެވެ. ނަމަވެސް އެ ހަމަލާއާ ގުޅިގެން ނަޝީދާއި އެހެން ބައެއް މީހުންނަށްވެސް އަނިޔާވި އެވެ.
އަދްހަމްގެ މައްސަލަ ކްރިމިނަލް ކޯޓުގައި ކުރިއަށް ގެންދިޔައީ ދިން ފަނޑިޔާރުންގެ ބެންޗަކުން އާއްމުންނަށް ސިއްރުކޮށްގެނެވެ. ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅުގެން އިތުރު މީހުންގެ މައްޗަށް ދައުވާކޮށްފައިވާއިރު އެ މައްސަލަތައް ކޯޓުގައި ހިނގަމުންދެ އެވެ.