އިންޑިއާ ސަރުކާރުގެ އެހީއާއެކު އައްޑޫ ސިޓީގައި ހިންގަން ހަމަޖެހިފައިވާ އީކޯ ޓުއަރިޒަމްގެ 5 މަޝްރޫއަކަށް ބޭނުންވާ ފައިސާގެ ތިންވަނަ އިންސްޓޯލްމަންޓް ހަވާލުކޮށްފި އެވެ.
މިދިޔަ އަހަރުގެ ފެބްރުއަރީމަހުގެ ތެރޭގައި އިންޑިއާއާއެކު ހެދި އެއްބަސްވުމެއްގެ ދަށުން އައްޑޫ ސިޓީގެ ފޭދޫ، މީދޫ، ހިތަދޫ، ހުޅުދޫ އަދި މަރަދޫ އަވަށުގައި އީކޯ ޓުއަރިޒަމްގެ މަޝްރޫއުތައް ކުރިއަށް ގެންދިއުމަށް ވަނީ ހަމަޖެހިފައެވެ.
މި މަޝްރޫއުތަކަށް ބޭނުންވާ ފައިސާގެ ފުރަތަމަ 2 އިންސްޓޯލްމެންޓްގެ ފާއިސާ މިދިޔަ އަހަރުގެ ޖުލައި މަހު އަދި މި އަހަރުގެ މާޗު މަހުގައި ދިވެހި ސަރުކާރާ ވަނީ ހަވާލުކޮށްފައެވެ. އެއީ ޖުމުލަ 11.4 މިލިއަން ރުފިޔާ އެވެ. މި މަޝްރޫއަށް ގްރާންޓުގެ ގޮތުގައި 38 މިލިއަން ރުފިޔާ އިންޑިއާއިން ވަނީ ހަމަޖައްސައި ދީފައެވެ.
މި މަޝްރޫއުތަކުގެ ސަބަބުން އައްޑޫގައި އިކޯ ޓުއަރިޒަމް ފުޅާވެ، ވަޒީފާގެ ފުރުސަތުތައް އިތުރު ވެގެންދާނެއެވެ.
އިންޑިއާ އެހީގެ ދަށުން މިހާރުވެސް އައްޑޫގައި އެކިއެކި މަޝްރޫއުތައް ދަނީ ހިންގަމުންނެވެ. އޭގެ ތެރޭގައި މަރަދޫ، ހިތަދޫ، އަދި ހުޅުދޫގައި ފިޝް ޕްރޮސެސިން ޕްލާންޓް އެޅުމާއި، އައްޑޫ ސިޓީ ހުޅުދޫގައި ޑްރަގް ޑިޓޮކްސް ސެންޓަރެއް ގާއިމް ކުރުން ހިމެނެއެވެ. މީގެއިތުރުން އައްޑޫ ޕޮލިސް އެކަޑަމީގެ މަސައްކަތާއި އައްޑޫގެ މަގުތައް ހެދުމުގެ މަސައްކަތް އިންޑިއާއިން އަންނަނީ ކުރަމުންނެވެ.