މިއަހަރުގެ ނޮވެމްބަރު މަހުގައި އަރިދަފުސް ރޯގާގެ 19،598 ކޭސް ރިޕޯޓްކޮށްފައިވާ ކަމަށް ހެލްތު މިނިސްޓްރީން ބުނެފި އެވެ.
ހެލްތު މިނިސްޓްރީން ހާމަކުރި ތަފާސްހިސާބުތައް ދައްކާގޮތުން ވޭތުވެދިޔަ ތިން އަހަރާ އަޅާބަލާއިރު މިއަހަރު އަރިދަފުސް ރޯގާ ޖެހިގެން ރިޕޯޓް ކުރި އަދަދު އިތުރެވެ. ނަމަވެސް މި އަހަރުގެ އޮކްޓޯބަރު މަހާ އަޅާބަލާއިރު، ނޮވެމްބަރު މަހު ފެނުނު އަރިދަފުސް ރޯގާގެ ކޭސްތަކުގެ އަދަދު ދަށްވެފައިވާ ކަމަށް އެ މިނިސްޓްރީން ހާމަކުރެއެވެ.
އޮކްޓޯބަރު މަހާ އަޅާ ބަލާއިރު ނޮވެމްބަރުގައި އިންފްލުއެންޒާއަށް ޕޮޒިޓިވްވި މިންވަރުވެސް ވަނީ ދަށްވެފައެވެ. އެގޮތުން މިދިޔަ އޮކްޓޫބަރު މަހު އިންފްލުއެންޒާގެ 598 ކޭސް ރިޕޯޓްކުރި އިރު މިދިޔަ މަހު ރިޕޯޓްކުރީ އެންމެ 104 ކޭސް އެވެ.
ބަލިވި މީހުންގެ އަދަދުތައް މަދުވިނަމަވެސް އެ ބައްޔަކާމެދު މެދު ސަމާލުކަންދޭ މިންވަރު ކުޑަނުކުރަން ހެލްތު މިނިސްޓްރީން ވަނީ އިލްތިމާސްކޮށްފަ އެވެ.