މީގެ ދުވަސްކޮޅެއް ކުރިން ބޮލީވުޑްގެ ކުރީގެ ބަތަލާއެއް ކަމަށްވާ ސުޗިތުރާ ސެން ހޮސްޕިޓަލުގެ އެޑްމިޓްކޮށް އައިސީޔޫގައި ފަރުވާ ދެމުން ގެންދިޔަ ވާހަކަ ކިޔުންތެރިންނާ ހިއްސާ ކުރެވިފައި ވާނެ އެވެ.
މިހާރު އަނެއްކާ ވެސް ހިތާމަވެރި ހަބަރެކެވެ. އެއީ ސުޗިތުރާ މަރުވި ވާހަކަ އެވެ. އޭނާ މަރުވީ ކަލްކަތާގެ ނާސިން ހޯމެއްގައި ފަރުވާ ދެމުން ދަނިކޮށް ހިތް ހުއްޓިގެން މިއަދު ހެނދުނުގެ ވަގުތެއްގަ އެވެ.
ސުޗިތުރާ މަރުވި އިރު، އޭނާ އަށް ހާއްސަ ފަރުވާ ދެމުން އަންނަތާ ވަނީ 26 ވަރަކަށް ދުވަސްވެފަ އެވެ.
ރިޕޯޓްތައް ބުނާ އުމުރުން 82 އަހަރުގެ ސުޗިތުރާގެ މޭގައި އިންފެކްޝަނެއް އުފެދި ނޭވާލާން އުނދަގޫވެގެން އޭނާ ހޮސްޕިޓަލްގައި އެޑްމިޓް ކުރީ މިދިޔަ ޑިސެމްބަރު މަހުގެ 23 ވަނަ ދުވަހު އެވެ.
ސުޗިތުރާއަކީ ފިލްމް "މަމްތާ" އިން 1966 ވަނަ އަހަރު އެންމެ މޮޅު ބަތަލާގެ ފިލްމް ފެއާ އެވޯޑް ވެސް ހާސިލްކޮށްފައިވާ ތަރިއެކެވެ. އޭނާގެ ފިލްމީ ކެރިއަރު ކުރިއަށް ދިޔައީ 1953-1979 އާ ހަމައަށެވެ.
އޭނާގެ ފާހަގަކޮށްލެވޭ އިތުރު ފިލްމްތަކުގެ ތެރޭގައި "ދީޕް ޖުވޭލޭ ޖާއީ"، "އުއްތަރު ފަލަގްނީ" އަދި "އާންދީ" ފަދަ ފިލްމްތައް ހިމެނެ އެވެ.
ސުޗިތުރާފެ ފިލްމީ ކެރިއަރުގައި އޭނާ ގިނައިން ކުޅެފައި ވަނީ ބެންގާލީ ފިލްމްތަކެވެ.
އޭނާއަކީ ބޮލީވުޑްގައި މިހާރު ވެސް ހަރަކާތްތެރިވަމުން އަންނަ ޒުވާން ދެ ބަތަލާއިން ކަމަށްވާ ރިޔާ ސެން އާއި ރައިމާ ސެންގެ މާމަ އެވެ.