ސ. ހިތަދޫ މެދު ދާއިރާ އަށް ޕީޕީއެމްގެ ފަރާތުން އިބްރާހިމް ރަޝީދު ވަޖުދި އައްޑު ސިޓީ ކައުންސިލް އިންތިޙާބަށް ނިކުމެފައި ވަނީ ކޯލިޝަންގެ އެއްބަސްވުމާ ޙިލާފަށް ކަމަށް ބުނެ މިވަގުތު ވެރިކަން ކުރާ ޕްރޮގްރެސިވް ކޯލިޝަންގެ ޓިކެޓުގައި ހިތަދޫ މެދު ދާއިރާ އަށް ކުރިމަތި ލާފައިވާ ކެންޑިޑޭޓް ޢަބްދުﷲ ޖަމީލު ނޫސް ބަޔާނެއް ނެރެފި އެވެ.
ޖަމީލު މިއަދު ނެރެފައިވާ ނޫސް ބަޔާނުގައި ބުނެފައިވާ ގޮތުގައި، ޖުމްހޫރީ ޕާޓީއިން ލޯކަލް ކައުންސިލް އިންތިޚާބުގައި ހިތަދޫ މެދު ދާއިރާއަށް ކެންޑިޑޭޓަކު ނެރުމަށް ނިންމާ އެޕާޓީގެ ޓިކެޓްގައި ޢަބްދުﷲ ޖަމީލު ނެރެފައި ވަނީ، ކޯލިޝަންގެ ތެރޭގައި ހިމެނޭ ޕާޓީތަކުގެ އިސްވެރިންގެ މެދުގައި މަޝްވަރާކުރެވި އެއްބަސްވެފައިވާ އެއްބަސްވުމާ އެއްގޮތަށް މެދު ދާއިރާގެ ގޮނޑި ޖުމްހޫރީ ޕާޓީއަށް ދިނުމުންނެވެ.
އަދި އެ އެއްބަސްވުމުގައިވާ ގޮތުން ކޯލިޝަންގެ ތެރޭގައި ހިމެނޭ ވަކިޕާޓީއަކަށް ދޫކުރެވިފައިވާ ގޮނޑިއަކަށް އެހެން ޕާޓީއަކުން ކެންޑިޑޭޓަކު ނުނެރޭނެކަމަށާއި އަދި އެގޮނޑި ދޫކޮށްފައިވާ ޕާޓީއަކުންނެރޭ ކެންޑިޑޭޓަކަށް ކޯލިޝަންގައި ހިމެނޭ އެހެން ޕާޓީތަކުގެ ފުރިހަމަ އެއްބާރުލުން ދެެވޭނެކަމަށް އެއްބަސްވުމުގައި ވާކަމަށް ނޫސް ބަޔާނުގައި ވެ އެވެ.
އަދި އެއްބަސްވުމާއި ޚިލާފަށް، ޖުމްހޫރީ ޕާޓީގެ ކެންޑިޑޭޓަކާއި އެއްދާއިރާއަށް ވާދަ ކުރުމަށް ޕްރޮގްރެސިވް ކޯލިޝަންގައި ހިމެނޭ ޕީޕީއެމް ގެ ކެންޑިޑޭޓަކު ނިކުންނެވުމާއި ގުޅިގެން މިމައްސަލަ ހައްލު ކުރެވޭތޯ ޕީ.ޕީ.އެމް އާއި ޖުމްހޫރީ ޕާޓީގެ އިސް ބޭފުޅުންނަށް ދަންނަވައިގެން ގިނަގުނަ މަސައްކަތްތަކެއް ޖަމީލް ކުރެއްވި ކަމަށާއި ޚާއްޞަކޮށް ޖޭ.ޕީ އިން މިމައްސަލަ ޙައްލުކުރުމުގެ ގޮތުން ޕީ.ޕީ.އެމް އާއި މަޝްވަރާ ކުރަމުން ދަނިކޮށް، ވަކިގޮތަކަށް އެއްބަސް ނުވެވި އޮއްވާ ރޭގައި ސ. ހިތަދޫ މުހިއްބުއްދީން ސްކޫލްގެ ހޯލްގައި ބޭއްވި ޖަލްސާއެއްގައި، މެދު ދާއިރާއަށް ޕީ.ޕީ.އެމްގެ ފަރާތުން (ކޯލިޝަންގައި ހިމެނޭ ޕާޓީތަކުގެ މެދުގައި ވެފައިވާ އެއްބަސް ވުމާއި ޚިލާފަށް) ކުރިމަތިލާފައިވާ އިބްރާހިމް ރަޝީދަށް ވޯޓް ދިނުމަށް ރައީސް ޔާމީން ގޮވާލެއްވި ކަމީ ވަރަށް ދެރަކަމެއް ކަމަށް ނޫސް ބަޔާނުގައި ވެ އެވެ.
ނިންމާލަމުން ޖަމީލް ބުނެފައި ވަނީ ޖުމްހޫރީ ޕާޓީ އާއި ކޯލިޝަންގެ އެހެން ޕާޓީތަކާއި ދެމެދު އެއްބަސްވެވިފައިވާ އެއްބަސްވުންތަކަށް ހުރިހާ ފަރާތްތަކުންވެސް އިޙްތިރާމް ކުރައްވާނެ ކަމަށް އުއްމީދު ކުރާކަމަށާއި ކޯލިޝަންގެ ތެރޭގައި ހިމެނޭ ޕާޓީތަކުގެ މެމްބަރުން އެކުވެރިކަމާއި އެއްބައިވަންތަކަމާއެކު މަސައްކަތް ކުރުމަކީ މިޤައުމުގެ މުސްތަޤްބަލަށްޓަކައި މިވަގުތަށް އެންމެ މުހިއްމު ކަމެއް ކަމަށެވެ.