އައްޑޫސިޓީ ފޭދޫ އަވަށުގެ މިސްކިތަކަށް ވަދެ އެތަންތަނަށް ގެއްލުންދީ، މިސްކިތް ތެރެއަށް ބޮޑުކަމު ގޮސްފިއެވެ.
ފޭދޫ މަގުއްދޫ ދާއިރާގެ ކައުންސިލަރު އާމިނަތު ސަލްމާ ވިދާޅުވީ، މިއަދު ފަތިހުގެ ވަގުތެއްގައި ފޭދޫގެ މަސްޖިދުލް އަމާނި އާއި މަސްޖިދުލް ނަޞްރި އަށް ވަދެ ބަޔަކު އެތަނަށް ގެއްލުން ދީފައިވާ ކަމަށެވެ. އަދި މިސްކިތް ތެރެއަށް ބޮޑުކަމު ގޮސް، އެތަން ހަޑިކޮށް، މިސްކިތުގެ ހުރުމަތް ކަނޑާލާފައިވާ ކަމަށްވެސް ސަލްމާ ވިދާޅުވިއެވެ.
މި މައްސަލައަކީ ކައުންސިލުން އިންތިހާއަށް ކަންބޮޑުވާ، ދަށު ދަރަޖައިގެ ފިނޑި އަމަލެއްގެ ގޮތުގައި ސަލްމާ ވަނީ ސިފަކުރައްވާފައެވެ. އަދި މި މައްސަލަ އަވަސް މައްސަލައެއް ގޮތުގައި ބެލުމަށް އައްޑޫ ފުލުހަށް ހުށަހަޅާފައިވާ ކަމަށްވެސް ސަލްމާ ވިދާޅުވިއެވެ.
"މި މުޑުދާރު އަމަލު ހިންގި މީހުންގެ މައްސަލަ އަވަސް މައްސަލައެއްގެ ގޮތުގައި ބައްލަވައި ދެއްވުމަށް އައްޑޫ ޕޮލިސް ސްޓޭޝަނަށް މިއަދު ވާނީ މައްސަލަ ހުށަހަޅާފައި" ސަލްމާ ވިދާޅުވި އެވެ.
މީގެއިތުރުން ސަލްމާ ވަނީ، ކުރިއަށް އޮތް ތަނުގައި އިސްލާމް ދީނަށް ފުރައްސާރަކުރާ މުޑުދާރު އަމަލުތައް ހުއްޓުވަން އައްޑޫސިޓީ ކައުންސިލުން ކުރަން ޖެހުނު ކޮންމެ ކަމެއްވެސް އެއްވެސް ފަސްޖެހުމެއް ނެތި ކުރާނެ ކަމުގެ ފުރިހަމަ ޔަގީންކަން އަވަށުގެ ރައްޔިތުންނަށް އަރުވާފައެވެ.
މިފަހުން މާލޭގެ 2 މިސްކިތަކަށް ކުޑަކަމުދިޔަ މައްސަލައެއްގައިވެސް މީހަކު ވަނީ ޖަލަށް ލާން ހުކުމް ކޮށްފައެވެ.