އައްޑޫ ސިޓީ ފޭދޫ އަވަށުގެ މިސްކިތަކަށް ބޮޑުކަމުދިޔަ މައްސަލައެއްގައި މީހަކު ހައްޔަރު ކޮށްފިއެވެ.
ދިވެހި ފުލުހުންގެ ޚިދުމަތުން ބުނީ، މި މައްސަލައާ ގުޅިގެން ހައްޔަރުކޮށްފައިވަނީ 47 އަހަރުގެ ފިރިހެނެއް ކަމަށެވެ.
މިކަމާ ގުޅިގެން އައްޑޫ ސިޓީގެ މޭޔަރު ވިދާޅުވީ، މިކަން ކުރިކަމަށް ބޮޑަށް ބެލެވެނީ ސިކުނޑި ހަމަނުޖެހޭ މީހެއް ކަމަށެވެ. އަދި މައްސަލަ މިހާރު ފުލުހުންނަށް ހުށަހަޅާފައިވާ ކަމަށްވެސް ވިދާޅުވި އެވެ.
އައްޑޫ ފޭދޫ މަގުއްދޫ ދާއިރާގެ މެމްބަރު ސަލްމާ ވިދާޅުވީ، ކުރިއަށް އޮތް ތަނުގައި އިސްލާމް ދީނަށް ފުރައްސާރަކުރާ މުޑުދާރު އަމަލުތައް ހުއްޓުވަން އައްޑޫސިޓީ ކައުންސިލުން ކުރަން ޖެހުނު ކޮންމެ ކަމެއްވެސް އެއްވެސް ފަސްޖެހުމެއް ނެތި ކުރާނެ ކަމަށެވެ. އަދި އެކަމުގެ ކަމުގެ ފުރިހަމަ ޔަގީންކަން އަވަށުގެ ރައްޔިތުންނަށް އަރުވާ ކަމަށެވެ.
މި މައްސަލައަކީ ކައުންސިލުން އިންތިހާއަށް ކަންބޮޑުވާ، ދަށު ދަރަޖައިގެ ފިނޑި އަމަލެއްގެ ގޮތުގައި ސަލްމާ ވަނީ ސިފަކުރައްވާފައެވެ.
މިއަދު ފަތިހުގެ ވަގުތެއްގައި ފޭދޫގެ މަސްޖިދުލް އަމާނި އާއި މަސްޖިދުލް ނަޞްރި އަށް ވަދެ ބަޔަކު އެތަނަށް ގެއްލުން ދީފައިވެއެވެ.