މި މަހުގެ 9 ވަނަ ދުވަހު ތިން މީހުންނާ އެކު ހއ. ދިއްދޫއިން މަހަށް ނިކުމެ އުޅެނިކޮށް ބަންޑުން ޖަހާލައި ސ. ހިތަދޫ ވިންސަން އަހުމަދު މުޖުތަބާ އާ އެކު ގެއްލުނު ބޮއްކުރާ ފެނިއްޖެ އެވެ.
މި ބޮއްކުރާ ފެނިފައި ވަނީ ހއ.އިހަވަންދޫގެ ހުޅަނގު އުތުރުން 84 ނޯޓިކަލް މޭލު ބޭރުން މަސްވެރިކަން ކުރަމުންދިޔަ "އަނދިރި އަނދިރިން" ނަމަކަށް ކިޔާ މަސް ދޯންޏަކަށް މި މަހު 14 ވަނަ ދުވަހުއެވެ.
މި ދޯނިން ވަނީ ބޮއްކުރާ މިއަދު ހެނދުނު އިހަވަންދު އަށް ވަނީ ގެންގޮސްފަ އެވެ.
ބޮއްކުރާ ފެނުނު އިރު ބޮއްކުރާގެ ފަލި އިނީ މައްޗަށް ވާގޮތަށް ކަމަށާއި ބޮއްކުރާގައި އެވަގުތު އެއްވެސް މީހަކު ނެތް ކަމަށް ބޮއްކުރާ ފެނުނު ދޯނިން އެމްއެންޑީއެފް ކޯސްޓްގާޑްގެ މެރިޓައިމް ރެސްކިއު ކޯޑިނޭޝަން ސެންޓަރަށް ބުންޏެވެ.
ބޮއްކުރާ ބަނޑުންޖަހާލާފައި ވަނީ ދިއްދޫ ހުޅަނގުފަރާތު މެދުނެރާ ދިމާލު އުރަ ފަށަށެވެ.
ބޮއްކުރާ ފެނުމާއި ގުޅިގެން، މިހާ ދިސާ އާ ގުޅިގެން މުޖުތަބާ، 39، އާ ބެހޭ މަޢުލޫމާތު މި ސަރަޙައްދުން ދަތުރުކުރާ ބޯޓްފަހަރަށް ދިނުމަށް ރާއްޖެއާއި އަވަށްޓެރި ޤަޢުމުތަކުގެ މެރިޓައިމް ރެސްކިއު ކޯޑިނޭޝަން ސެންޓަރުތަކަށް ވަނީ ދީފަ އެވެ.
އަދި އެހެން ގޮތްގޮތުން ވެސް މުޖުތަބާ އާ ބެހޭ އެއްވެސް މަޢުލޫމާތެއް ލިބޭތޯ ކޯސްޓްގާޑުން އަންނަނީ މަސައްކަތް ކުރަމުންނެވެ.