ސ.ހިތަދޫ ޕޮލިސް ސްޓޭޝަނުގެ ފަރާތުން "ހައުސް ވިޒިޓިން" ގެ ނަމުގައި ހިތަދޫގެ ގޭގެއަށް ޒިޔާރަތް ކުރުމުގެ ޕްރޮގްރާމް ފަށައިފި އެވެ.
ޑިސެމްބަރު 14، 2013 އިން ފެށިގެން ކުރިއަށްގެންދާ މި ޕްރޮގްރާމްގައި ކޮންމެ ދުވަހަ ކުވެސް ގޭގެ އަށް ގޮސް ރައްޔިތުންނާ ބައްދަލުކޮށް އެ ފަރާތްތަކަށް ދަތިވާ ކަންތައްތައް ހޯދައި ފުލުހުން އިތުރަށް ރަނގަޅު ކުރަން ޖެހޭ ކަންތައްތަކުގެ މަޢުލޫމާތު ފުލުހުން އަންނަނީ ހޯދަމުންނެވެ.
ފުލުހުންނާ މެދު ޢާއްމު ރައްޔިތުން ދެކޭ ގޮތް ބަލައި، ރަށުގައި އާއްމުކޮށް ހިނގާ ކުށްތައް ކުރާ ކަމަށް ފާހަގަ ކުރެވޭ ކަންކަން އޮޅުން ފިލުވައިދީ އެ ކަންކަމުގެ ތެރެއިން ސަމާލުކަން ދޭންވީ ކަންތައްތަކުގެ މަޢުލޫމާތު ވެސް އަންނަނީ މި ޕްރޮގްރާމްގެ ތެރެއިން ފޯރުކޮށް ދެމުންނެވެ.
މީގެ އިތުރުން ކުޑަކުދިން ކުށް ކުރުމުން ދުރު ކުރުމަށް އެޅިދާނެ ފިޔަވަޅުތަކާ ބެހޭ ގޮތުން ވެސް މައުލޫމާތު ދެ އެވެ. އަދި ހާދިސާއެއް ހިނގައިފި ނަމަ ރައްޔިތުން އަމަލު ކުރާނެ ގޮތުގެ މަޢުލޫމާތު ވެސް ގޭގެއަށް ޒިޔާރަތް ކުރުމުގެ މި ޕްރޮގްރާމުގައި ރައްޔިތުންނަށް ފޯރުކޮށް ދެ އެވެ.
މި ޕްރޮގްރާމަށް ހިތަދޫ ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ލިބޭ ކަމަށް ފުލުހުން ބުންޏެވެ.