އައްޑޫގެ ޓުއަރިޒަމަށް ކުރި އުންމީދު ފެނަށް ދާތީ ސާލިހާގެ ކަންބޮޑުވުން

އައްޑޫގެ ޓުއަރިޒަމަށް ކުރި އުންމީދު، ނާއުންމީދަށް ބަދަލުވެފައިވާތީ އައްޑޫ މީދޫ އަވަށުގެ ކައުންސިލަރު އާމިނަތު ސާލިހާ ކަންބޮޑުވުން ފާޅުކުރައްވައިފި އެވެ.

ސަރުކާރުން ލިބެންޖެހޭ އެއްބާރުލުން ނުލިބޭތީ އައްޑޫ ސިޓީގެ ޓޫރިޒަމަށް ކުރި އުންމީދު ނާއުންމީދަކަށް ބަދަލުވެފައިވާ ކަމަށް، އައްޑޫ ކެނެރީފް ރިސޯޓު ހުޅުވައި އެތަން އަލުން އޮޕަރޭޝަނަށް ގެނައުމަށް މަސައްކަތް ކުރައްވާ ރިސޯޓް ލައިފްގެ މެނޭޖިން ޑިރެކްޓަރު މުހައްމަދު ޝާޒް ވަލީދު ވަނީ ވިދާޅުވެފައެވެ.

މިކަމާ ގުޅިގެން މީދޫ އަވަށުގެ ކައުންސިލަރު އާމިނަތު ސާލިހާ ކުރެއްވި ފޭސްބުކު ޕޯސްޓެއްގައި ވިދާޅުވީ، އައްޑޫގެ ރައްޔިތުންނަށް ދޮގު އުންމީދުތައް ދިނުން ސަރުކާރުން ހުއްޓާލަންޖެހޭ ކަމަށެވެ. އަދި ޗާޓަރު ތިން ފްލައިޓް އެތެރޭގެ އުދުހުންތަކަށް ފަސޭހަ ގަޑިއެއް ދިނުމަށް ވަލީދު އެދުނު އެދުމަށް ސަރުކާރުން އެއްބާރުލުން ނުދީ އައްޑޫގެ ޓުއަރިޒަމް ކުރިއަރާނެކަމަށް ގަބޫލުކުރަނީ ކީއްވެތޯ ސާލިހާ ވަނީ ސުވާލު އުފައްދާފައެވެ.

އައްޑޫގެ ކޮންމެ އަވަށެއްގައި ޓުއަރިޒަމް ޒޯނު އެޅުމުގެ ބޭނުމަކީ ކޮބާ؟ އައްޑޫގެ ޓުއަރިޒަމަށް އިންވެސްޓް ކުރަން ޝައުގުވެރިކަން ހުންނާނީ ކާކު؟ ސާލިހާ ވިދާޅުވިއެވެ.

މީގެއިތުރުން ސާލިހާ ވަނީ، މާލެއިން ގަމަށް ފަތުރުވެރިން ފަސޭހައިން ގެނެވޭނެ ގޮތެއް ހައްދަވައިދެއްވުން އެދި މޭޔަރަށާއި އައްޑޫގެ އެމްޕީންނަށް ގޮވާލައްވާފައެވެ.

ސަރުކާރުގެ އެއްބާރުލުން ނުލިބިގެން އައްޑޫގެ ޓޫރިޒަމަށް އަނެއްކާވެސް ހުއްޓުމެއް އައިސްފައިވާއިރު އައްޑޫގެ ފަތުރުވެރިކަން ކުރިއަރުވައި 8000 ވަޒީފާ އާއި އެކު 8000 ޓޫރިސްޓު އެނދު ތަރައްޤީ ކުރައްވާނެކަމަށް ރައީސް އިބްރާހިމް މުހައްމަދު ސޯލިހު ވަނީ ރިޔާސީ އިންތިހާބުގެ ތެރޭގައި ވައުދުވެވަޑައިގެންފަ އެވެ.

މީގެއިތުރުން ގަން އިންޓަނޭޝަނަލް އެއާޕޯޓު ޒަމާނީ ވަސީލަތްތަކާއެކު ތަރައްޤީ ކުރެވި، ދުނިޔޭގެ ފަސް މަންޒިލަކުން ދުވާލަކު ފަސް ފްލައިޓު ފަސް އަހަރު ދުވަހުގެ ތެރޭ ޖެއްސުމަކީ ވެސް ރައީސްގެ ވައުދުފުޅެކެވެ.

އައްޑޫގައި ހިންގަމުންދިޔަ ދެ ރިސޯޓު ކަމަށްވާ ކެނަރީފް އަދި ޝަންގްރިއްލާ ރިސޯޓު ބަންދުކޮށްފައިވާއިރު ހަންކެޑެގައި ރިއަލް އެސްޓޭޓް ޓޫރިޒަމް ފައްކާ ކުރަން ނިންމާފައިވާކަން ސަރުކާރުން ދާދިފަހުން ވަނީ އިއުލާންކޮށްފަ އެވެ.