އިންސާނާ ކަމަކަށް ޢަޒުމު ކަނޑައަޅައިފި އެވެ. އެކަމެއްގައި އޭނާއަށް ފެންނާންހުރި ހުރިހާ އެހީތެރިކަމެއް ލިބޭތޯ ކުރެވެން ހުރި މަސައްކަތްތައް ވެސް ކޮށްފި އެވެ.
ނަމަވެސް އެ ކަމެއް ޙާޞިލެއް ނުވި އެވެ. ދުވަސްތައް ފާއިތުވަމުން ދަނީ އެވެ. އަދިވެސް އޭނާ ހުރީ އެކަން ޙާޞިލު ވާނެކަމުގެ އުންމީދުގަ އެވެ. އެންމެ ފަހުން އެހެން ގޮތެއް ނެތުމުން އެ އިންސާނާ އޭނާގެ ވެރި ރަސްކަނލާގެ އަށް ދުޢާ ވެސް ދަންނަވައިފި އެވެ.
މިގޮތަށް ދުޢާ ދަންނަވާތާ ވެސް އެތައް ދުވަހެއް ފާއިތުވެއްޖެ އެވެ. އެ އިންސާނާ މާޔޫސް ވާގޮތް ވާން ފަށައިފި އެވެ. ދެން އެއަށް ފަހު އޭނާ ބުނެތެވެ.
އަހަރެން ދުޢާކޮށްފީމެވެ. އަދިވެސް އިޖާބައެއް ނުކުރައްވަ އެވެ. އަހަރެމެންގެ ތެރެއިން ގިނަ މީހުންގެ ޙާލަތަކީ މިއެވެ. އޭނަގެ އެ ދުޢާ އިޖާބަ ނުކުރެވޭނެކަން ކަށަވަރުވާ ހިސާބަކީ މި އެވެ. މިފަދައިން އުންމީދު ކަނޑާލުމެވެ. އަދި މި ފަދައިން ބުނުމެވެ. މިއީ ދުޢާ އިޖާބަ ނުކުރެއްވޭނެ ސަބަބެއް ކަމުގައި މާތް ނަބިއްޔާގެ އިރުޝާދުތަކުން އަހަރެމެންނަށް ވަނީ އަންގަވައި ދެއްވާ ފައެވެ.
ތިމާގެ ހުރިހާ ކަމެއް ބަލަހައްޓަވާ ތިމާގެ ވެރި ރަސްކަލާނގެ އަށް ނިސްބަތްވާ ގޮތަށް މިފަދަ ނާއުންމީދީ ބަހެއް ދުލުން ބޭރުކޮށްލާ މީހަކަށް ވުރެ ވަކިން މޮޔަ މީހަކު ހުންނާނެ ހެއްޔެވެ؟ އަހަރެމެން މާތް ﷲ އަށް ދަންނަވާ ދުޢާ އިޖާބަ ކުރައްވާނެ ވަގުތު އެކަލާނގެ ސިއްރު ކުރައްވާފައިވުމަކީ އެކަލާނގެ ޙިކްމަތްތަކުގެ ތެރެއިން ވާކަންކަމެވެ. އެއީ، އެކަލާނގެ އަޅުތަކުން އިމްތިޙާން ކުރެއްވުމަށެވެ. މި ދުނިޔޭގެ ޙަޔާތަކީ އިމްތިޙާނެއް ކަމުގައި ވާތީ އެވެ.
އަހަރެމެން ކުރާ ދުޢާ އިޖާބަ ނުކުރައްވައޭ ބުނާ މީހުން އެ މީހުން ކުރަމުންދާ ފާފަތަކާ މެދު ޣާފިލުވެގެންވެ އެވެ. އެކަލާނގެ ބިމުގައި ދެ ފައިތަޅާ ބޮޑާކަމާއެކު ހިނގަމުން، ފާފަތަކުގައި ޣަރަޤުވެތިބެ، އެކަލާނގެ އަށް ލަދުވެތިވުމެއް ނެތި ދުޢާ ދެންނެވުމުން އެދުޢާ އިޖާބަ ނުކުރައްވާނެކަން އެ މީހުންނަށް ނުވިސްނެނީ ހެއްޔެވެ؟
ނިކަން ތިބެ، ފާފަތަކުން ތައުބާވެ، ގަދަފަދަވަންތަ ﷲ އަށް ނިކަން އަތްތައް އުފުލާ ދުޢާ ދަންނަވާލަ ބަލާށެވެ! އިޚްލާޞްތެރި ހިތަކާ އެކުގަ އެވެ.
އޭރުން އެދުޢާ އިޖާބަ ކުރައްވާނެކަމީ އެއްވެސް ޝައްކެއް ހުރި ކަމެއް ނޫނެވެ. އަހަރެން ތިޔަ އެކުވެރިންނަށް ﷲ ކުރައްވާފައިވާ މަތިވެރިވަންތަ ވަޢުދުފުޅު ހަނދާންކޮށް ދެމެވެ.
ސޫރަތުލް ޣާފިރޫން ގެ 60 ވަނަ އާޔަތުގެ މާނާގައިވެ އެވެ. "އަދި ތިޔަ ބައި މީހުންގެ ވެރިރަސްކަލާނގެ ވަޙީ ކުރެއްވި އެވެ. ތިޔަ ބައި މީހުން ތިމަން ރަސްކަލާނގެ އަށް ދުޢާ ކުރާށެވެ! ތިމަންރަސްކަލާނގެ ތިޔަ ބައި މީހުންގެ ދުޢާ އިޖާބަ ކުރައްވާހުށީމެވެ. ހަމަކަށަވަރުން، ތިމަންރަސްކަލާނގެއަށް (ދުޢާކޮށް) އަޅުކަންކުރުމަށް ކިބުރުވެރިވެގަންނަ މީހުން (ދަންނާށެވެ!) ނިކަން ހުރެ ނިކަމެތިވެގެންވާ ޙާލު، އެއުރެން ނަރަކައަށް ވަންނާނެތެވެ." ސޫރަތުލްޣާފިރޫން،60 ވަނަ އާޔަތް
ދެން ހަނދާންކޮށްލަން ޖެހޭ އަނެއް ކަމަކީ، އަހަރެމެން ﷲގެ ޙަޟުރަތުން އެދި ދަންނަވަންވީ ކަމެއް ނުވެ މާޔޫސްވެ ދިޔައިމާ އެކަންޏެއް ނޫނެވެ. އެކަމެއް ފެށުމުގެ ކުރިން ވެސް ﷲ ޙަޟުރަތުން ވާގި އެދުމަކީ ވަރަށް ވެސް މުހިންމު ކަމެކެވެ. އެކަލާނގެ ވާތްގަށް އެދި އުންމީދާއި ހިތްވަރާ އެކު އެކަމެއް ފެށުމަކީ ކަންކަން ކާމިޔާބުވުމުގައި ވަރަށް ވެސް ބޭނުންތެރި ކަމެކެވެ.
އަހަރެމެން ވާންވީ، އަބަދުވެސް ﷲ އަށް ދުޢާ ކުރުމުގެ މަތިވެރި އަޅުކަމުގައި މާޔޫސް ނުވެ ތިބޭ ބަޔަކަށެވެ. ﷲ ގެ ޙަޟުރަތުން އުންމީދު ކަނޑާނުލާ ބަޔަކަށެވެ. މާތް ﷲ އަޅަމެން އެންމެންނީ، ރިވެތިގޮތުގައި އިޚްލާޞްތެރިކަމާ އެކު އެކަލާނގެއަށް ދުޢާ ދަންނަވާ އަދި އެ ކުރާ ދުޢާ އިޖާބަ ކުރެއްވުމުގެ ހެޔޮ ތައުފީޤު ލިބިގެންވާ ބަޔަކު ކަމުގައި ލައްވާށި އެވެ! އާމީން.