ސ.އަތޮޅު މަދަރުސާގެ ޖަލްސާކުރާ ހޯލް އެއްކޮން ފުރާލާފައިވަނީ އެތައް ހާސް ދަރިވަރިންގެ ކުރެހުންތަކުންނެވެ. އޭގައި މާނަފުން އެތައް މެސެޖެއް ގެނެދީފައިވެ އެވެ.
މިއަހަރުގެ ދުނިޔޭގެ ކުޑަކުދިންގެ ދުވަހުގެ ހަރަކާތްތަކުގެ ތެރެއިން އައްޑޫގައި ކުރިއަށްދިޔަ އާޓް އެގްޒިބިޝަންގައި ވަނީ 3000 ދަރިވަރުންގެ ކުރެހުން ބައިވެރިކޮށްފަ އެވެ. އެންމެ ބޮޑަށް ފާހަގަ ކުރެވުނީ ތުއްތު ކުދިންގެ ހުނަރުވެރިކަމާއި ގެނެސްދީފައިވާ މެސެޖްގެ ފުންކަމެވެ.
ޔުނިސެފް މޯލްޑިވްސް އާއި ދިވެހި ފުލުހުންނާއި އެހެނިހެން މުވައްސަސާތައް ގުޅިގެން ކުރިއަށްދާ ކުޑަދިންގެ ހަރަކާތްތަކުގެ ތެރެއިން އާޓް އެގްޒިބިޝަންގައި ކުރެހުންތައް ބައިވެރިކުރުމަށް މުޅި ރާއްޖޭގެ ހުރިހާ ސްކޫލްތަކަށް ހުޅުވާލި އެވެ. އެހެން ކަމުން އެ މައުރަޒުން ރާއްޖޭގެ އެކި ސްކޫލްތަކުގެ ދަރިވަރިންގެ ހުނަރުވެރިކަން ފެނިގެންދެ އެވެ.
އެޑިއުކޭޝަން މިނިސްޓްރީގެ ޑެޕިއުޓީ ޑިރެކްޓަރޖެނަރަލް ހުސެއިން ރަޝީދު ވިދާޅުވި ގޮތުން ރާއްޖޭގެ އެކި ސްކޫލްތަކުން 3000 ކުރެހުން ލިބިފައިވެ އެވެ.
"ކުޑަކުދިންގެ ރައްކާތެރިކަމާއި، ކުޑަކުދިންނަށް ކުރާ ގޯނާތައް ހުއްޓުވުމާއި، އެފަދަ މައުލޫތައް ދީގެން ކުރެހުންތައް ބައިވެރިކުރަން ހުޅުވާލީ. މީގައި އެބަހުރި ހމަ ވަަރަށް މާނަފުން ވަރަށް ހައިރާންކުރުވަނިވި ކުރެހުންތައް ލިބިފައި،" ހުސެއިން ރަޝީދު ވިދާޅުވި އެވެ.
މި މައުރަޒުގައި ބައިވެރިކުރި ކުރެހުންތައް ބަލައި ކުދިންގެ އެ ކުރެހުންތަކުން އެ ބުނެދީފައިވާ ވާހަކަތަކާމެދު ފުންކޮށް ވިސްނާނެ ކަމަށް ވެސް އޭނާ ވިދާޅުވި އެވެ.
މި މައުރަޒުން ފެނިގެން ގޮސްފައިވާ ގިނަ ކުރެހުންތަކުގައި ބުނެދީފައިވަނީ ކުޑަކުދިންނަށް ކުރާ ގޯނާތައް ހުއްޓުވުމަށް ދޭ މެސެޖްތަކުގެ މައްޗަށެވެ. އޭގެ އިތުރުން ކުދިންނަށް ލިބިޖެހޭ ހައްގުތަކުގެ މައްޗަށްވެސް ގިނަ ކުރެހުންތައް ކުރަހާފައިވެ އެވެ.