މަސައްކަތް ނިމިފައި ހުންނަތާ ގިނަ ދުވަސްތަކެއްވެ، ހަލާކުވަމުންދާ ސ. ފޭދޫގެ ހައުސިން ޔުނިޓްކަށް ކުރިމަތިލުމުގެ ފުރުސަތު މާދަމާ އިން ފެށިގެން ހުޅުވާލަން ހައުސިން މިނިސްޓްރީން ނިންމައިފި އެވެ.
އެ މިނިސްޓްރީން ނެރަފައިވާ އިއުލާނެއްގައި ބުނީ ފޭދޫގައި އިމާރާތްކޮށްފައިވާ ހައުސިން ޔުނިޓްތަކަށް ކުރިމަތިލުމުގެ ފުރުސަތު މާދަމާ އިން ފެށިގެން ފެބްރުއަރީ 16 ވަނަ ދުވަހާ ހަމައަށް ހުޅުވާލާފައިވާ ކަމަށެވެ.
މިކަމށް އެދޭ ފޯމް މާދަމާ އިން ފެށިގެންނ ފޭދޫ އަވަޑު އޮފީހުންނާއި ހައުސިން މިނިސްޓްރީން ދޫކުރަން ފަށާނެ އެވެ.
ކުރިން އައްޑޫ ސިޓީ ކައުންސިލްގެ ބެލުމުގެ ދަށުން ފޭދޫ ހައުސިން ޔުނިޓްތައް ދޫކުރަން މަސައްކަތް ކުރި ނަމަވެސް، އެކަން މިހާތަނަށް ނުވެ، ގިނަ ބައެއްގެ ޝަކުވާތައް ވެސް ލިބިފައިވާތީ މިކަން މިހާރު ކުރިއަށް ގެންދާނީ ސީދާ ހައުސިން މިނިސްޓްރީން ކަމަށް ދާދި ފަހުން މިނިސްޓަރު ޑރ. މުހައްމަދު މުއިއްޒު ވެސް ވަނީ ވިދާޅުވެފަ އެވެ.
އެގޮތުން ހައުސިން ޔުނިޓްތަކަށް އެންމެ ފަހުން ކުރި އިއުލާން މިނިސްޓްރީން ވަނީ ބާތިލްކޮށްފަ އެވެ.
ޑިސެމްބަރު 6، 2013 ގައި ކުރި އެ އިއުލާނާ ގުޅިގެން 327 މީހަކު ކުރިމަތިލައިގެން ގުރުއަތަށް ހޮވިފައި ވަނީ 315 ފަރާތެކެވެ.
އެހެން ނަމަވެސް މިހާރު އެކަން ބާތިލްކޮށް އަލުން މިނިސްޓްރީން ހުޅުވާލީ މައިގަނޑު ހަތް ޝަރުތަކާ އެކުގަ އެވެ. އަދި ހައުސިން ޔުނިޓްތައް ދޫކުރުމުގައި ޕޮއިންޓް ދޭނެ އުސޫލްތަކެއް ވެސް މިނިސްޓްރީން ވަނީ އާންމުކޮށްފަ އެވެ.