ބައިނަލްއަޤްވާމީ ކުޑަކުދިންގެ ދުވަސް ފާހަގަކުރުމަށް އައްޑޫ ސިޓީ ހުޅުދޫ – މީދޫ ގައި ކަލަރ ރަންއެއް ބާއްވައިފި އެވެ.
ފުލުހުން އިސްނަގައިގެން ކުރިއަށްގެންދިޔަ މި ކަލަރ ރަން ބާއްވާފައިވަނީ މިއަދު ހަވީރު ހުޅުދޫ – މީދޫ ބަހާއުއްދީން މަގުގައެވެ.
މި ކަލަރ ރަންގައި ދެ އަވަށުގެ ގިނަ އަދަދެއްގެ ކުޑަކުދިން ބައިވެރިވެފައިވާއިރު، ގިނަ ބެލެނިވެރިންނާއި އާންމުންވެސް ވަނީ ބައިވެރިވެފައެވެ. އަދި ކަލަރ ރަން ނިންމާލުމަށްފަހު މަޝްހޫރު "ރޮބޯ މޭން" ގެ އިވެންޓެއްވެސް ވަނީ ކުރިއަށް ގެންގޮސްފައެވެ.
އައްޑޫ ސިޓީގައި ބައިނަލްއަޤްވާމީ ކުޑަކުދިންގެ ދުވަސް ފާހަގަކުރުމަށް ގިނަ ހަރަކާތްތަކެއް ވަނީ ރާވާފައެވެ. އެގޮތުން އިއްޔެ މީދޫ އަވަށުގައި ބިލްބޯޑް އިފްތިތާޙް ކުރުމުގެ ރަސްމިއްޔާތު ވަަނީ ބާއްވާފައެވެ. އަދި އާޓް އެގްޒިބިޝަނެއްވެސް ވަނީ ކުރިއަށް ގެންގޮސްފައެވެ.
މި ކަލަރ ރަންގެ އިތުރު އިވެންޓްތައް އައްޑޫގެ ގުޅިގައިވާ އަވަށްތަކުގައި ވެސް ކުރިއަށް ގެންދަން ރާވާފައިވާކަމަށް ފުލުހުން މަޢުލޫމާތު ދެ އެވެ.