ޒުވާން ބަތަލާ އަނުޝްކާ ޝަރްމާ ޕްރޮޑިއުސްކޮށް، އެކްޓް ކުރާ ފުރަތަމަ ފިލްމް "އެންއެޗް 10" ގެ ޝޫޓިން އިއްޔެ އެވެ.
ފިލްމުގެ މަސައްކަތް ފެށުމާ އެކު އުފަލުން ހުރި އަނުޝްކާ ވަނީ އިއްްޔެ މިކަމާ ގުޅިގެން ޓްވީޓެއް ވެސް ކޮށްފަ އެވެ.
އެ ޓްވީޓްގައި ޝާހްރުކް ހާނާ އެކު 2008 ވަނަ އަހަރު "ރަބް ނެ ބަނާދީ ޖޯޅީ" އިން ބޮލީވުޑަށް ތައާރަފްވި ބަތަލާ ބުނީ "ހުކުރު ދުވަހަކީ ފިލްމުގެ ފުރަތަމަ ޝޫޓިން ފަށައިގަތް ދުވަސް" ކަމަށެވެ. އަދި އެކަމާ ވަރަށް އުފާވެފައި ހުރި ނަމަވެސް، ކުޑަކޮށް ބިރުން ހުރި ކަމަށް ކާމިޔާބް ފިލްމުތަކެއް ކުޅެފައިވާ ބަތަލާ ބުންޏެވެ.
"އެންއެޗް 10" އަކީ އަނުޝްކާ އާއި އޭނާ މިހާރު ކުޅެމުން އަންނަ އެހެން ފިލްމެެއް ކަމަށްވާ "ބޮމްބޭ ވެލްވެޓް" ޑިރެކްޓަރު އަނޫރާގް ކެޝަޕްގެ ޕްރޮޑަކްޝަން ހައުސް ފެންޓަމް އާ ގުޅިގެން އުފައްދާ އެކްޝަން ތްރިލާއެކެވެ.
މި ފިލްމް ޑައިރެކްޓް ކުރަނީ އަބޭ ޑިއޯލް ލީޑް ރޯލް ކުޅުނު "މެނޮރާމާ ސިކްސް ފީޓް އަންޑާ" ގެ ޑައިރެކްޓަރު ނަވްދީޕް ސިންގެވެ.
އަނުޝްކާގެ ކުރިއަށް ހުރި އިތުރު ފިލްމުތަކުގެ ތެރޭގައި ރަންބީރު ކަޕޫރާ އެކު ކުޅޭ "ބޮމްވޭ ވެލްވެޓް" ގެ އިތުރުން އާމިރް ހާނާ އެކު ކުޅޭ "ޕީކޭ" ހިމެނެ އެވެ.
އަނުޝްކާގެ އެންމެ ފަހުން ނިކުތް ފިލްމަކީ 2012 ވަނަ އަހަރު ރިލީޒްވި މަރުހޫމް ޔާޝް ޗޯޕްޅާގެ "ޖަބް ތަކް ހެ ޖާން" އެވެ.