އިންޑިއާ އިން ރާއްޖެ ކަނޑައަޅާފައި ހުންނަވާ ސަފީރު މުނޫ މަހާވަރު، ކުރީގެ ރައީސް މައުމޫން އަބްދުލްގައްޔޫމާ މިއަދު ބައްދަލުކުރައްވައިފި އެވެ.
މައުމޫން ކުރެއްވި ޓްވީޓެއްގައި ވިދާޅުވީ މި ބައްދަލުކުރެއްވުމުގައި ރާއްޖެ އާއި އިންޑިއާއާ ދެމެދު އޮތް ގާތް ގުޅުމާ ގުޅޭގޮތުން ވަރަށް އެކުވެރި މާހައުލެއްގައި މަޝްވަރާ ކުރެވުނު ކަމަށެވެ.
Was delighted to meet the new Indian HC Excellency Munu Mahawar @AmbMunu today. We discussed our very close bilateral relations in a cordial atmosphere. Thank you HC for your important insights. pic.twitter.com/CKf3nZro5a
— Maumoon Abdul Gayoom (@maumoonagayoom) December 21, 2021
އިންޑިއާގެ ސަފީރާއި މައުމޫން ބައްދަލުކުރައްވާފައިމިވަނީ ރާއްޖޭގައި ތިބި އިންޑިއާ ސިފައިން ބޭރުކުރުމަށް ގޮވާލާ އިދިކޮޅު ޕީޕީއެމް/ޕީއެންސީ ކޯލިޝަނުން "އިންޑިއާ އައުޓް" ގެ ނަމުގައި ހަރަކާތެއް ފަށާފައިވާ ދަނޑިވަޅެއްގަ އެވެ. ކުރީގެ ރައީސް އަބްދުﷲ ޔާމީން ޖަލުން މިނިވަންވުމަށްފަހު މި ހަރަކާތް ވަނީ އިތުރަށް ވަރުގަދަކޮށްފަ އެވެ. އެގޮތުން މި ހަރަކާތް ރާއްޖޭގެ އެކި ރަށްތަކަށް ވެސް މިހާރު ވަނީ ފުޅާކޮށްފަ އެވެ.
އިންޑިއާ އައުޓް ހަރަކާތަށް އަންނަ ބުރާސްފަތި ދުވަހު ޔާމީން ފ.ނިލަންދޫ އަށް ވަޑައިގަތުމަށް ހަމަޖެހިފައިވާއިރު މިދިޔަ ހަފްތާގައި ޔާމީން ވަނީ މި ކެމްޕޭނަށް ކ.ގުރައިދޫ އާއި ތުލުސްދޫއަށް ވެސް ވަޑައިގެންފަ އެވެ.
އެ ރަށްތަކަށް ކުރެއްވި ޒިޔާރަތުގައި ޔާމީން ވަނީ އިންޑިއާ އަށް ވަރަށް ބޮޑަށް ފާޑު ވިދާޅުވެ ވާހަކަދައްކަވާފަ އެވެ. އެގޮތުން ޔާމީން ވަނީ އިންޑިއާ ސިފައިން ޖެހޭނީ ރާއްޖެއިން ފައިބަން ކަމަށާއި އިންޑިއާގެ އަސްކަރިއްޔާ އަށް ރާއްޖޭގައި ޖާގައެއް ނެތް ކަމަށް ވިދާޅުވެފަ އެވެ.
ޔާމީން އެގޮތަށް ވާހަކަދައްކަވާފައިވާއިރު މިއަދު އެމްޑީޕީން ބޭއްވި އިވެންޓެއްގައި އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވަނީ އިންޑިއާ އައުޓް ނުގޮވޭނެ ކަމަށާއި މިއީ ފުލުހުން ނިކުމެ ހުއްޓުވަންޖެހޭ ކަމެއް ކަމަށް ވިދާޅުވެފަ އެވެ.
"ރައީސް ޔާމީނަކަށް އިންޑިއާ އައުޓް ޖައްސަވައިގެން ބޭރަށް ނިކުމެ ގޮވަމުން ނުހިންގެވޭނެ. އެއީ ދިވެހިރާއްޖޭގެ ފުލުހުން ނިކުމެ ހުއްޓާންޖެހޭނެ ކަމެއް" ނަޝީދު ވިދާޅުވި އެވެ.