އިއްޔެ ނިމުނު ލޯކަލް ކައުންސިލްގެ އިންތިހާބުގެ ވަގުތީ ނަތީޖާ އިން ދައްކާ ގޮތުން އައްޑޫ ސިޓީ ކައުންސިލްގެ ހަ ގޮނޑި ވެސް އެމްޑީޕީން ވަނީ ކަށަވަރުކޮށްފަ އެވެ.
މި ކަށަވަރު ކުރުން މި އައީ ކައުންސިލްގައި މިހާރު ވެސް ތިއްބެވި ތިން ބޭފުޅަކާ އެކުގަ އެވެ. އޭގެ ތެރެއިން އެއް ބޭފުޅަކީ މަރަދޫފޭދޫ ވެސް ހިމެނޭ ގޮތަށް މަރަދޫ ދާއިރާ ތަމްސީލް ކުރައްވާ ކައުންސިލަރު އަބްދުﷲ ތޮއްޔިބް (ޓޮމް) އެވެ.
ކައުންސިލްގެ ފާއިތުވި ތިން އަހަރަށް ބަލާ އިރު، އައްޑޫ ސިޓީ ކައުންސިލްގެ ހަ މެމްބަރުންނަށް ބަލާ އިރު އެންމެ ހިންގުންތެރި އަދި ކަމަށްކަމޭ ހިތައިގެން މިހާތަނަށް މަަސައްކަތް ކުރެއްވި ހަމަ އެކަނި ބޭފުޅަކީ ޓޮމެވެ. އެކަން މަރަދޫ ދާއިރާގެ އިތުރުން އައްޑޫގެ އެހެން ދާއިރާތަކުގެ ވަރަށް ގިނަ ރައްޔިތުން ވެސް ގަބޫލް ކުރެ އެވެ.
ގިނަ ބަޔަކު ސިފަ ކުރާ ގޮތުގައި ޓޮމްއަކީ ހާއްސަކޮށް އޭނާގެ ދާއިރާ އަށް ކަންކަން ކުރަން ވަރަށް ބޮޑު އިސްކަމެއް ދެއްވާ ބޭފުޅެކެވެ. އޭގެ ތެރެއިން ބައެއް ކުދިކުދި އެކަމަކު ހަމަ ރައްޔިތުންނަށް މުހިއްމު ބައެއް ކަންތައްތަކަށް ބަލާލުން ކީއްތޯ އެވެ؟
ފުރަތަމަ ކަމަކަށް މަރަދޫ ބަނދަރުމަތީގައި ތާރު ނޭޅި އޮތް ސަރަހައްދުގައި ތާރު އެޅުނީ ހަގީގަތުގައި ވެސް ޓޮމް ނެންގެވި އިސް ނެންގުވުމާއި އެކަން ކުރަން އޭނާ ފައި ވިއްދުމެވެ. އެކަން އެގޮތަށްވުމާ އެކު މަރަދޫ ބަނދަރަކީ އައްޑޫގެ ރަށްރަށުގެ ބަނދަރުތަކުގެ ތެރެއިން އެންމެ ފުރިހަމަ އެންމެ ރީތި އެއް ބަނދަރެވެ.
ފޭދޫ ބަނދަރަށް ބަލާލަމާތޯ އެވެ. ހަގީގަތަށް ބަލާ ނަމަ މިއީ އައްޑޫގެ އެންމެ ހަލަބޮލި އެންމެ ކާރުބާރޫ ބޮޑު ބަނދަރެވެ. އައްޑު އަށް ޒިޔާރަތް ކުރާ މެހުމާނުން ވެސް އާންމުކޮށް ބޭނުން ކުރަން ޖެހޭ ބަނދަރެކެވެ.
އެކަމަކު މި ބަނދަރުގެ ހާލަތަކީ ކޮބައިތޯ އެވެ؟ ބަނދަރާ ދިމާލުގައި އަދިވެސް އެ އޮތީ ތާރު ނޭޅި އެވެ. މައްސަލައެއް ނެތެވެ. ފޭދޫގެ މިހާރުގެ ކައުންސިލަރު އަހުމަދު މިރުޒާދު (މިރާ) އަށް އެކަން ކުރާނެ ހިތްވަރެއް ނުލިބުނީ އެވެ.
މަރަދޫގައި ޓޮމްގެ އިސް ނެންގެވުމާ އެކު ކުރެވުނު އަނެއް މަސައްކަތަކީ އެ ރަށުގެ ފުޓްބޯޅަ ދަނޑު ރަނގަޅު ފެންވަރަަކަށް ތަރައްގީ ކުރެވުމެވެ. މިކަންމި ގޮތަށް ނުވެގެން މަރަދޫފޭދޫ ޒުވާނުންތަކެއްގެ ފާޑު ކިއުންތައް ޓޮމަށް އަމާޒި ވިޔަސް ހަގީގަތުގައި އޭނާއަކީ ކަންކަން ކުރަން އުޅުއްވާ ބޭފުޅެކެވެ. ކަންކަމުގައި އިސް ނަންގަވާ ބޭފުޅެކެވެ.
ަބައެއް ކައުންސިލަރުން ބައެއް ފަހަރު އެ ބޭފުޅުންނާ ހަވާލުކޮށްފައި ހުންނަ ޑިޕާޓްމަންޓްތަކަށް ވަޑައިނުގަންނަވާތީ، ކައުންސިލަރު މެދުވެރިކޮށް ކުރަން ޖެހޭ ކަންކަން ނުވާ ފަހަރުތައް ވެސް އާދެ އެވެ.
މިކަހަލަ ދަނޑިވަޅުތަކުގައި ވެސް ގުޅާލުމުން އެންމެ ފަސޭއިން ވަޑައިގެންނެވޭ ބޭފުޅަކަށް ހުންނަވަނީ ޓޮމް އެވެ. އެހެންވެ ބައެއް ފަހަރު މަރަދޫ ދާއިރާ ނޫން އެހެން ދާއިރާތަކުގެ ކަންކަމުގައި ވެސް ޓޮމް އުޅުއްވާ ތަން ފެނެ އެވެ. އެކަން އާންމުން ވެސް ފާހަގަ ކުރެ އެވެ.
އަދި "އަހަރަމެންގެ ކައުންސިލަރު ކޮބައިތޯ" އެ ކަހަލަ ދަނޑިވަޅުތަކުގައި ބައެއް ރައްޔިތުންނަށް ސުވާލް ވެސް ކުރެވެ އެވެ.
ޓޮމްއަކީ ކައުންސިލްގައި ތިއްބެވި އެހެން ކައުންސިލަަރުންނާ ހިލާފަށް ޒިންމާދާރުކަމާ އެކު މަސައްކަތް ކުރަައްވަން އަބަދު ވެސް އިސްކަން ދެއްވާ ބޭފުޅެކެވެ.
އަދި މަރަދޫފޭދު އަށް ޓޮމް އެއްވެސް ވަރަކަށް އަޅާ ނުލާ ކަމަށާއި އޭނާގެ ހުރިހާ ފޯކަސްއެއް އަމާޒުކޮށްފައި ހުރީ މަރަދު އަށް ކަމަށް ގަބޫލް ކުރާ މަރަދޫފޭދޫ މީހުން މަދެެއް ނޫނެވެ.
އެ ރަށުގެ ރައްޔިތުން އޭނާ އާ ދޭތެރޭ ހިތްހަމަނުޖެހޭ އަނެއް ސަބަބަކީ ރަށުގައި ހިނގަމުން ދިޔަ ސިއްހީ މަރުކަޒު އައްޑޫގެ ޕަބްލިކް ހެލްތު ޔުނިޓްގެ ގޮތުގައި ހަމަޖައްސައި، މިހާރު އެތަނަކީ ރަށަށް އެއްވެސް "ފައިދާއެއް ނެތް ނުކުރާ ބޭކާރު" ތަނެއްގެ ގޮތުގައި ސިފަ ކުރެވޭ ގޮތަށް ހިންގުމެވެ.
އެކަމަކު ފާހަގަކޮށްލެވޭ ކަމަކީ އެ އިމާރާތް ޕްރައިވެތް ފަރާތަކަށް ސިއްހީ ކަމަކަށް ކުއްޔަށް ވެސް ދޭން ޓޮމް ވަރަަށް ގިނަ މަސައްކަތްތަކެއް ކުރެއްވި ކަމެވެ. އަދި އެކަން އެގޮތަށް ކުރަން ނިންމީ ހަމަ މަރަދޫފޭދު އަށް ރަނގަޅަކަށް ކަމަށް ކައުންސިލުން ވެސް ތަކުރާރުކޮށް މީގެ ކުރިން ބުނެފައިވެ އެވެ.
ހާސިލް ކުރަން ބޭނުންވި ހުރިހާ ކަމެއް މިހާތަނަށް ހާސިލްވެފައި ނެތަސް ޓޮމް ވަނީ ނަތީޖާތަކެއް ދައްކުވައިފަ އެވެ. މަރަދޫގެ ކޮޅުގައި ޕާކެއް ހެދުނީ ވެސް ޓޮމްގެ ހިއްސާ ވަރަށް ބޮަޑަށް އޮވެގެންނެވެ. އެ މަސައްކަތް އޭނާ ކުރުވީ އައްޑޫގެ ތިން ރަށެއްގެ މަގު ތާރު އަޅައިގެން ހަދައި ދިން ސްރީ ލަންކާގެ ކުންފުނި އައިސީސީ ލައްވަ އެވެ.
ގައިމު ވެސް އެ ޕާކަކީ މިހާރު ގިނަ ބަޔަކަށް ހިތްހަމަޖެހުން ގެނެސް ދޭ ތަނެކެވެ. އަދި ހަމަ މިއާ އެކު މަރަދޫފޭދޫގައި ހުންނަ ބޭންކް އޮފް މޯލްޑިވްސް (ބީއެމްއެލް) ބްރާންޗާ ދިމާލުގައި ވިއްސާރަ މޫސުމުގައި ފެން ބޮޑުވާ މައްސަލަ ހައްލުކޮށް ދޭން ވެސް ޓޮމް ގިނަ މަސައްކަތްތަކެއް ކޮށްފައިވެ އެވެ.
މީގެ އިތުރަށް ތާރު އަޅައިގެން މަރަދޫ މަގު ހަދައި ނިމުމާ އެކު، މަގުގައި ބައްތި ޖެހުމުގެ މަސައްކަތް ވެސް އަވަސް މުއްދަތެއްގެ ތެެރޭގައި ޓޮމް ވަނީ ކުރުވައިފަ އެވެ.
އަދި މަރަދޫގައި މަސްވެރިކަމަށް ހާއްސަ ބިޔަ ޕްރޮޖެކްޓެއް ސްޕެއިންގެ ކުންފުންޏަކާ ހަވާލުކޮށްގެން ކުރިއަށް ގެންދަން ނިންމުމަކީ ވެސް ޓޮމްގެ ވަރަށް ބޮޑު މަސައްކަތެކެވެ. އެ މަސައްކަތް އަދި މިހާތަނަށް ފެށިފައި ނެތް ނަމަވެސް، ދެން މި ފެށޭ ދައުރުގައި ޓޮމް ހާސިލް ކުރަން އަމާޒު ހިފާ ކަންކަން ހާސިލް ކުރައްވަން މަސައްކަތް ކުރައްވާނެ ކަމަށް ގަބޫލް ކުރަމާ ހިނގާށެވެ. ދެ ގުނައަށެވެ. އަދި ކުރި ފަހަރާ ހިލާފަށް މަރަދޫފޭދޫ ރައްޔިތުންނާ ވެސް ޓޮމް ހާއްސަ ކައިރި ގުޅުމެއް ބާއްވަން ޖެހެ އެވެ.
އެ އަވަށުގެ ރައްޔިތުންގެ ލޯބި ވެސް ބޭނުންވެ އެވެ. ކުރިއަށް ދާން ފަސޭހަ ގޮތަކީ ވެސް ހަމަހަމަކަމާ އެކު ހުރިހާ ރައްޔިތުންނާ ދޭތެރޭ އެއް އުސޫލަކުން އަޅާލެވިގެންނެވެ.
ކޮންމެ ގޮތެއް ވިޔަސް މިހާރު ގަބޫލް ކުރަން ޖެހޭނީ މިހެންނެވެ؛ ދެ ވަނަ ދައުރަކަށް މަރަދު އާއި މަރަދޫފޭދޫ ރައްޔިތުން އޭނާ އަށް އެ ދާއިރާގެ ގޮނޑި ދޭނީ އިތުބާރެއް އޮވެގެން ކަމެވެ. އޭނާއަކީ މަގާމަށް އެކަށޭނެ ބޭފުޅަަކަށް ވާތީ އެވެ؟ އެހެން ނޫން ނަމަ ދެވަނަ ދައުުރަކަށް ފުރުސަތު ދިނުމުގެ ބޭނުމަކީ ކޮަބައި ބާވަ އެވެ؟
ޓޮމްއަކީ މީޑިއާ އާ ވެސް ވަރަށް ގާތް ބޭފުޅެކެވެ. އޭނާ އާ ގުޅަން އުނދަގޫ އެއްވެސް ގަޑިއެއް ނޯންނާނެކަން އައްޑޫގައި މަސަައްކަތް ކުރާ ނޫސްވެރިންނަށް ވަރަށް ރަނގަޅަށް އެނގޭނެ އެވެ.
އެހެންވެ ކުރިމަގުގައި ވެސް ޓޮމްގެ ފަރާތުން ނަތީޖާތަކެއް ފެންނާނެ ކަމަށް ގަބޫލް ކުރެ އެވެ.
ޓޮމް ހޯއްދެވި ކާމިޔާބީ އަށް "އައްޑޫ ލައިވް" ފަރާތުން ވެސް ހޫނު މަރުހަބާއެއް ކިޔަމެވެ.