އައްޑޫގައި 2011 ވަނަ އަހަރު ބޭއްވި ސާކް ސަމިޓާ ދިމާކޮށް ސ. ހިތަދޫ ރީޖަނަލް ހޮސްޕިޓަލްގައި އިމާރާތެއް އެޅުމުގެ މަސައްކަތް ބިޑިން އުސޫލްތަކާ ހިލާފަށް ބަޔަކާ ހަވާލުކޮށްފައިވާ މައްސަލައެއްގައި ސަދަން ހެލްތު ސާވިސް ކޯޕަރޭޝަން (އެސްއެޗްއެސްސީ) ބޯޑުގެ ކުރީގެ ޑިރެކްޓަރު އިބްރާހީމް ސޮބްރީގެ މައްޗަށް ދައުވާ ކުރަން ޕްރޮސެކިއުޓާ ޖެނެރަލް (ޕީޖީ) އޮފީހަށް ހުށަހަޅައިފި އެވެ.
އޭސީސީން ބުނީ ހިތަދޫ ރީޖަނަލް ހޮސްޕިޓަލުގައި ކޮޓަރިތައް އެޅުމަށް ބަޔަކު ހޯދުމަށް ކުރި އިއުލާނާ ގުޅިގެން ބިޑްތައް ބަލައިގެންފައި ވަނީ މުއްދަތު ހަމަވިތާ އެއް ދުވަސް ފަހުން ކަމަށެވެ.
އަދި އެ ގޮތަށް އަމަލުކުރީ އޯގަސްޓް 28، 2011 ގައި ބިޑްގެ މުއްދަތު ހަމަވި އިރު އެ ކަމަށް ޝައުގުވެރިކަން ފާޅު ކުރި ފަރާތްތަކުން ބިޑް ހުށަހަޅަން އޮތް ގަޑިއަށް ހާޒިރުނުވުމުން ކަމަށާއި އަލުން އިއުލާން ކުރުމުގެ ބަދަލުގައި ބިޑް ހުށަހެޅުމަށް އެއް ދުވަސް ދިނީ އެ ކަމުގައި އެހެން އެއްވެސް ފަރާތަކާ މަޝްވަރާ ކުރުމެއް ނެތި އެމްޑީޕީގެ ސެކްރެޓަރީ ޖެނެރަލްގެ މަގާމުގައި މިހާރު ހުންނެވި ސޮބްރީ ކަމަށް ތަހުގީގުގައި އޭނާ އެއްބަސްވެފައިވާ ކަމަށް ވެސް އޭސީސީން ބުންޏެވެ.
އަދި ބިޑް ހުށަހެޅި ތިން ފަރާތުގެ ތެރެއިން ދެ ފަރާތެއްގެ ބިޑް ފުރިހަމަކޮށްފައި ނުވި ނަމަވެސް އެ ބިޑްތައް ބަލައިގަނެ އިވެލުއޭޓްކޮށްފައިވާ ކަމަށް ވެސް އޭސީސީން ބުންޏެވެ.
މީގެ އިތުރުން ލިޔުންތައް ނެތް ނަމަވެސް އިވެލުއޭޝަން ކޮމިޓީގެ މެންބަރުންނަށް ފެންނަ ގޮތަކަށް މާކްސް ދިނުމަށް 2007 ގައި "ނަމޫނާ" ދޯނީގައި ސަރުކާރާ ދެކޮޅު ހަރަކާތެއް ހިންގުމުގެ ދައުވާކޮށް، މަސް ދުވަހުގެ ޖަލު ހުކުމެއް ދާދި ފަހުން ފުރިހަމަ ކުރި ސޮބްރީ ލަފާ ދީފައިވާކަން ތަހުގީގަށް އޭނާ ދީފައިވާ ބަޔާނުން އެނގެން އޮތް ކަމަށް ވެސް އޭސީސީން ބުންޏެވެ.