މަސްތުވާތަކެތީގެ މައްސަލަ ހައްލުކުރުމަށް ރައީސް އިބްރާހިމް މުހައްމަދު ސޯލިހު ޗެއާ ކުރައްވާ ޓާސްކް ފޯހެއް އެކުލަވާލައްވައި މީގެ މަހެއްހާ ދުވަސްކުރިން މަސައްކަތް ކުރަމުން އަންނަ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު މިއަދު ވިދާޅުވެއްޖެ އެވެ.
ބޮޑެތި އޮޕަރޭޝަންތަކުގައި ހޯދާފައިވާ މަސްތުވާތަކެތި ނައްތާލުމުގެ މަސައްކަތް ފެށުމަށް މިއަދު ދޫނިދޫގައި ބޭއްވި ރަސްމިއްޔާތުގައި ޕޮލިސް ކޮމިޝަނަރު މުހައްމަދު ހަމީދު ވިދާޅުވީ ރައީސުލް ޖުމްހޫރިއްޔާ އެކުލަވާލި ޓާސްޓްފޯހުން މަސްތުވާތަކެތީގެ މައްސަލަ ހައްލުކުރުމުގެ މަސައްކަތް ކުރަމުންގެންދާ ކަމަށެވެ. ނަމަވެސް އެ ޓާސްކްފޯހުގައި ހިމެނެނީ ކޮން ބޭފުޅުންނެއް ކަމެއް އަދި އެކަމުގެ އިތުރު ތަފްސީލެއް ނުދެެއްވަ އެވެ.
މި ރަސްމިޔާތުގައި ހޯމް މިނިސްޓަރު އިމްރާން އަބްދުﷲ ވެސް ވަނީ އެ ޓާސްކްފޯހާ ގުޅޭ ގޮތުން ވާހަކަ ދައްކަވާފަ އެވެ. މިނިސްޓަރު ވިދާޅުވި ގޮތުގައި އަލަށް އެކުލަވާލި އެ ޓާސްކް ފޯހުން ކުރަމުން އަންނަ މަސައްކަތުގެ ނަތީޖާ އަންނަ އަހަރުގެ ފުރަތަމަ ކުއާޓާގައި ފެންނަން ފަށާނެ ކަމަށެވެ. ނަމަވެސް މިނިސްޓަރު އިމްރާންވެސް އެ ޓާސްކް ފޯހުން ކުރަމުން އަންނަ މަސައްކަތުގެ ތަފްސީލެއް ވިދާޅެއްނުވެ އެވެ.