ވޭދުވެދިޔަ ރައްްޔިތުންގެ މަޖިލީހުގައި މަކުނުދޫ ދާއިރާގެ މެމްބަރު، ޑރ. އަނާރާ ނައީމް އަދާލަތު ޕާޓީން ވަކިވެވަޑައިގެންފި އެވެ.
އަނާރާ އަދާލަތު ޕާޓީން ވަކިކޮށްދިނުމަށް އެދި އެ ޕާޓީގެ ރައީސް ޝެއިހް އިމްރާން އަބްދުﷲއަށް ފޮނުއްވެވި ސިޓީ ވަނީ ސޯސަލްމީޑިޔާގައި ހިއްސާ ކުރައްވާފަ އެވެ. އަނާރާ އޭނާގެ ފޭސްބޫކް އެކައުންޓް މެދުވެރިކޮށް ހިއްސާކުރި އެ ސިޓީގައި އެ ޕާޓީން ވަކިވާން ނިންމި ސަބަބެއް ވިދާޅެއްނުވެ އެވެ.
"ވޭތުވެ ދިޔަ ދުވަސްތަކުގައި މަނިކުފާނާއި ޕާޓީގެ އެންމެހާ މެމްބަރުންގެ ފަރާތުން އަޅުގަނޑަށް ލިބުނު އެހީތެރިކަމާއި އެއްބާރުލުމަށް ނިޔާޔަތަަށް ޝުކުރު އަދާކުރަމެވެ." އިމްރާނަށް ފޮނުއްވެވި ސިޓީގައި އަނާރާ ވިދާޅުވެފައި އެވެ.
އައްޑޫލައިވްއާ ވާހަކަ ދައްކަވަމުން އަނާރާ ވިދާޅުވީ ސިޔާސީ އެހެން ޕާޓީއަކާ ގުޅުމުގެ ވިސްނުން އަދި ނެތް ކަމަށެވެ. އެހެން ނަމަވެސް ސިޔާސީ ދާއިރާ ދޫކޮށްލުމުގެ ވިސްނުމެއް އޭނާގެ ނެތެވެ.
"ސިޔާސީ ދާއިރާއާ މުޅިން ވަކިވުމުގެ ވިސްނުމެއް ނެތް. އަޅުގަނޑު މި ގައުމަށް ހިދުމަތްކޮށްދިނުމުގައި ހުރުމުގެ ވިސްނުން އެބަހުރި،" އޭނާ ވިދާޅުވި އެވެ.
ޑރ. އަނާރާ ސިޔާސީ މައިދާނުގައި ފުރަތަމަ މަސައްކަތްކުރެެއްވަން ފެއްޓެވީ އަދާލަތު ޕާޓީގެ ތެރެއިންނެވެ. އޭނާ ވަނީ މި އަހަރު ޕީއެޗްޑީ ހާސިލް ކުރައްވާފަ އެވެ. އޭނާ ތީސިސް ލިޔުއްވީ ރާއްޖޭގެ ވެރިކަމުގެ ނިޒާމާ ގުޅޭ ގޮތުންނެވެ.