ހުސްވެފައިވާ ކޮަމަންޑޫ ދާއިރާގެ ބައި އިލެކްޝަނުގައި ވެރިކަންކުރާ މައި ޕާޓީ އެމްޑީޕީގެ ފަރާތުން ވާދަކުރާ ކެންޑިޑޭޓު ފޯމް އިލެކްޝަންސް ކޮމިޝަނަށް ހުށައަޅައި ކެމްޕޭނަށް ތައްޔާރުވެއްޖެ އެވެ.
މި އިންތިހާބުގައި އެމްޑީޕީގެ ޓިކެޓްގައި ވާދަކުރަނީ މުހައްމަދު ރާޝީދު އެވެ. އޭނާ އިލެކްޝަންސް ކޮމިޝަނަށް މިއަދު ފޯމް ހުށައެޅުމަށް ދިޔައިރު އޭނާއާއެކު އެމްޑީޕީ ލީޑަރޝިޕްގެ ބޭފުޅުން ބައިވެރިވެވަޑައިގެންނެވި އެވެ.
ކޮމަންޑޫ ދާއިރާގެ މަޖިލީހުގެ ބައިި-އިލެކްޝަން އަށް ޕާޓީގެ ފަރާތުން ވާދަކުރައްވާ ކެންޑިޑޭޓް މުހައްމަދު ރާޝިދު @Rashid141221 ގެ ފޯމު ހަވާލު ކުރުން pic.twitter.com/RPMUumyBoy
— MDP Secretariat (@MDPSecretariat) December 29, 2021
އިލެކްޝަނަށް ފޯމް ހުށައެޅުމަށްފަހު ނޫސްވެރިންނާ ވާހަކަ ދައްކަވަމުން އެމްޑީޕީގެ ނައިބު ރައީސް މުހައްމަދު ޝިފާޒް ވިދާޅުވީ ކޮމަންޑޫ ދާއިރާގެ ގޮނޑި އެމްޑީޕީއަށް ކާމިޔާބުކޮށްދިނުމަށް ކުރަން ޖެހުނު ކޮންމެ މަސައްކަތެއް ކުރުމަށް އެމްޑީޕީން ދެމި ތިބޭނެ ކަމަށެވެ. އަދި ވިދާޅުވީ މާދާމާ ރޭ ކެންޑިޑެންސީ ނަމްބަރުތައް ލިބުމުން ރާޝިދުގެ ކެމްޕެއިން ރަސްމީކޮށް ލޯންޗްކޮށް މަސައްކަތް ފަށާނެ ކަމަށެވެ.
" އިރާދަ ކުރެއްވިއްޔާ އަޅުގަނޑުމެންގެ ކެމްޕެއިން ރަސްމީކޮށް ލޯންޗްކޮށް، ރަސްމީ އަޅުގަނޑުމެންގެ ދަތުރުތައްފަށައި، ޑޯޓްޑޯ ޓީމްތައް ރުކުރުވާލާ އަޅުގަނޑުމެންގެ ރަސްމީ ޖޯޝާ ފޯރީގައި އެމްޑީޕީން ކެމްޕެއިން ކުރިއަށް ގެންދާނެ. މި އިންތިހާބަކީ އިރާދަ ކުރެއްވިއްޔާ ބޮޑު ތަނުން އަޅުގަނޑުމެން ކާމިޔާބު ކުރާނެ، މޮޅުވާނެ އިންތިހާބެއް،" ޝިފާޒް ވިދާޅުވި އެވެ.
ފާއިތުވި ދައުރުގައިވެސް ކޮމަންޑޫ ދާއިރާގެ މަޖިލިސް އިންތިހާބު ކޮށްފައިވަނީ އެމްޑީޕީންނެވެ. ކޮމަންޑޫ ދާއިރާގެ ބައި އިލެކްޝަނުގައި އިދިކޮޅު މައި ޕާޓީ ޕީޕީއެމް އާއި އަލަށް އުފެއްދި އެމްއެންޕީ އިންވެސް ކެންޑިޑޭޓަކު ވާދަކުރެ އެވެ.