ޒުވާން ބަތަލާ އާލިއާ ބަޓް އޭނާގެ ކުރިއަށް އޮތް ފިލްމް "ހައިވޭ" އަށް ލަވައެއް ކިޔައިފި އެވެ.
މި ތަޖުރިބާ އާ ބެހޭ ގޮތުން ކަރަން ޖޯހަރުގެ "ސްޓޫޑަންޓް އޮފް ދި އިޔާ" އިން ވިދާލި ބަތަލާ ބުނީ އޭނާ ލަވައެއް ކިޔަން ނިންމި މައިގަނޑު ސަބަބަކީ "ހައިވޭ" ގެ ޑައިރެކްޓަރު އިމްތިއާޒް އަލީ އެދިގެން ކަމަށެވެ.
"އަހަރެންގެ އަޑު ލަވައެއް ކިޔަން ބުނުމުން އެކަމާ ފުރަތަމަ ވަރަށް ނާވަސްވި. އަހަންނަކީ އެއްގޮތަކަށް ވެސް ލަވަ ކިއުންތެރިއެއް ނޫން. އަހަރެން ލަވަ ކިޔަނީ ފާހާނާ ތެރޭގައި،" ޑައިރެކްޓަރު/ޕްރޮޑިއުސަރު މަހޭޝް ބަޓްގެ ދަރިފުޅު ބުންޏެވެ.
އާލިއާ ބުނީ އިމްތިއާޒްގެ އެދުމުގެ މަތިން އޭނާ "ހައިވޭ" ގެ ލަވައެއް ކިޔަން އެއްބަަސްވުމުން އެ ފިލްމުގެ މިއުޒިކް ޑައިރެކްޓަރު އަދި އޮސްކާ ވެސް ހާސިލްކޮށްފައިވާ އޭއާރް ރަހުމާންގެ އެހީތެރިކަން ވަރަށް ބޮޑަށް ލިބުނު ކަމަށެވެ.
އެގޮތުން ލަވަ ރެކޯޑް ކުރުމުގެ ކުރިން ވޮއިސް ޓްރޭނިންތަކެއް ރަހުމާންގެ އެހީތެރިކަމާ އެކު ހެދި ކަމަށް އާލިއާ ބުންޏެވެ.
"ލަވަ ރެކޯޑް ކުރި އިރު ކޮންެމެވެސް ވަރަަކަށް މިސްޓޭކްސްތައް ވެސް ހެދުނު. އެކަމަކު ރަހްމާން ސާ ވަރަށް ރަނގަޅަށް ކިޔައި ދީގެން ލަވަ ރެކޯޑްކޮށް ނިންމާލީ،" އާލިއާ ބުންޏެވެ. "ރަހުމާން ސާ އަދި ބުނި އަހަރެން ދެ އަހަރު ދުވަހުގެ ވޮއިސް ޓްރޭނިންއެއް ހަދައިފިއްޔާ ވަރަށް މޮޅު ލަވަ ކިއުންތެރިއަކަށް ވެދާނެ ކަމަށް. އެހެންވެ މިހާރު ނިންމައިގެން މި ހުރީ ކާމިޔާބް ބަތަލާއަަކަށް ނުވެއްޖެ ނަމަ ލަވަ ކިއުމާއިގެން ކުރިއަށް ދާން ވެސް ނިންމައިގެން."
އާލިއާ "ހައިވޭ" އަށް ކިޔައި ދިން ލަވަ އަދި އާންމެއް ނުކުރެ އެވެ. އެހެން ނަމަވެސް އަންނަ މަހުގެ 21 ގައި ރިލީޒް ކުރާ އެ ފިލްމުގެ ޓްރެއިލާތަކާއި ބައެއް ލަވަތައް މިހާރު ވަނީ ދައްކަން ފަށައިފަ އެވެ.
ބޮލީވުޑްގެ ބަތަލާއިގެން ތެރެއިން ޕްރިޔަންކާ ޗޯޕްޅާއަކީ ވެސް މޮޅު ލަވަ ކިއުންތެރިއެކެވެ.
އެހެން ނަމަވެސް މިހާތަނަށް އަދި ފިލްމަކަށް ހިންދީ ލަވައެއް އޭނާ ކިޔައިފައެއް ނުވެ އެވެ.