އައްޑޫ ސިޓީ ކައުންސިލްގެ އިދާރާއިން ބޭރުގައި ބޭއްވޭ ފުރަތަމަ ޖަލްސާ ހުޅުދޫ އަވަށު އޮފީހުގައި ބޭއްވޭތީ މިއަދަކީ ތާރީޚީ ދުވަހެއް ކަމަށް އައްޑޫ ސިޓީގެ މޭޔަރު ޢަލީ ނިޒާރު ވިދާޅުވެއްޖެއެވެ.
ނިޒާރު މިހެން ވިދާޅުވެފައިވަނީ މިއަދު އައްޑޫ ސިޓީ ހުޅުދޫ އަވަށު އޮފީހުގައި ބާއްވާ އައްޑޫ ސިޓީ ކައުންސިލްގެ 4 ވަނަ ދައުރުގެ 31 ވަނަ ޖަލްސާގައެވެ.
ނިޒާރު ވިދާޅުވީ، މި ކަމަކީ ކުރިންވެސް ޕްލޭންކުރެވިފައި އޮތް ކަމެއް ކަމަށާއި ނަމަވެސް ބަލިމަޑުކަމާއި އެހެނިހެން ދަތިތައް ހުރުމުގެ ސަބަބުން މިކަން ނުކުރެވި އޮތީ ކަމަށެވެ.
"މިކަން ކުރިންވެސް މިގޮތަށް ކުރަން ނިންމައިގެން ތިބީ. ނަމަވެސް ބަލިމަޑުކަމާއި ހުރި އެހެނިހެން ބައެއް ދަތިކަންކަމާއެކު މިކަން ނުވެ ހުރީ" ނިޒާރު ވިދާޅުވި އެވެ.
ނަމަވެސް އަހަރު ނިމުމުގެ ކުރިން ބާއްވާ އެންމެ ފަހު ޖަލްސާ ހުޅުދޫ އަވަށު އޮފީހުގައި ބޭއްވޭތީ މޭޔަރު ވަނީ އެކަން ފާހަގަކުރައްވާފައެވެ.
އައްޑޫ ސިޓީ ކައުންސިލްގެ ބައެއް ޖަލްސާތައް މީގެ ކުރިންވެސް ހުޅުދޫ އާއި މީދޫގައި ބާއްވާފައިވާއިރު، މި ޖަލްސާއަކީ އެ ދެ އަވަށުން އަވަށެއްގެ އޮފީސް ޖަލްސާ ކުރާ މާލަމުގައި ބޭއްވޭ ފުރަތަމަ ޖަލްސާކަމަށް މޭޔަރު ވަނީ ވިދާޅުވެފައެވެ.