ފްރާންސްގެ މަޝްހޫރު ކޮސްމެޓިކް ބްރޭންޑެއް ކަމަށްވާ "ލޯރިއާން" ގެ އެމްބެސެޑަރުކަން ބޮލީވުޑްގެ މިހާރު އެންމެ ނުފޫޒް ގަދަ ބަތަލާއިންގެ ތެރޭގައި ހިމެނޭ ކެޓްރީނާ ކެއިފަށް ލިބިއްޖެ އެވެ.
ޒުވާން ބަތަލާ އަށް މި ލިބުނު ފުރުސަތަކާ އެކު ކެޓްރީނާ މަސައްކަތް ކުރަން ޖެހޭނީ "ލޯރިއާލް" ގެ އުފެއްދުންތައް އިޝްތިހާރުކޮށް މާކެޓް ކުރުމުގައި އިންޑިއާ ރެޕްރެޒެންޓް ކުރާށެވެ.
މިއީ މި ފުރުސަތު ލިބުނު ބޮލީވުޑްގެ ހަތަރު ވަނަ ބަތަލާ އެވެ.
"ލޯރިއާލް" މިހާރު ރެޕްޒެންޓެޓިވް ކުރަނީ ރީތީގެ ރާނީ އައިޝްވާރިއާ ރާއި ބައްޗަން އާއި ސޯނަމް ކަޕޫރުގެ އިތުރުން ހޮލީވުޑްގައި މަސައްކަތް އިންޑިއާ އަށް އުފަން ފްރެއިޑާ ޕިންޓޯ އެވެ.
ފްރެއިޑާއަކީ 2009 ވަނަ އަހަރުގެ އެންމެ މޮޅު ފިލްމްގެ އޮސްކާ ހާސިލް ކުރި "ސްލަމްޑޯގް މިލިއަނާ" އިން ފިލްމީ ދާއިރާ އަށް ނިކުތް ބަތަލާއެކެވެ.
"ލޯރިއާލް" އިން ލިބުނު ފުރުސަތަކާ އެކު ކެޓްރީނާ ބުނީ އެ ޓީމާ ގުޅުމުގެ ފުރުސަތު ލިބުމަކީ ވަރަށް ބޮޑު އުފަލެއް ކަމަށެވެ. އަދި މުޅި ދުނިޔޭގައި ވެސް މި މަސައްކަތުގައި ހަރަކާތްތެރި ވަނީ ވަރަށް ކުޅަދާނަ އަންހެނުންނަށް ވާތީ، އެ ފަންތީގައި މަސައްކަތް ކުރަން ފުރުސަތު ލިބުމަކީ ޝަރަފެއް ކަމަށް ކެޓްރީނާ، 30، ބުންޏެވެ.
ކެޓްރީނާއަކީ މިހާރު ވެސް ބޮލީވުޑްގެ ބަތަލާއިންގެ ތެރެއިން އެންމެ ގިނަ ޕްރޮޑަކްޓްސްތައް އިޝްތިހާރު ކުރާ އެއް ބަތަލާ އެވެ. ހަމައެކަނި އިޝްތިހާރުތަކުން ވެސް އޭނާ އަށް ގިނަ އަދަދެއްގެ ފައިސާ އަށް ލިބެ އެވެ.
"ލޯރިއާލް" ކެޓްރީނާ އަށް ފުރުސަތު ލިބުމާ އެކު އައިޝްވާރިއާ ވަނީ އޭނާ އަށް މަރުހަބާ ވެސް ކިޔައިފަ އެވެ.
"ލޯރިއަލްގެ ފެމިލީން ކެޓްރީނާ އަށް ހޫނު މަރުހަބާއެއް ކިޔަން. އަހަންނަށް ޔަގީން ލޯރިއާލްގެ އިންޑިއާގެ ބްރޭންޑް އެމްބެސަޑަރެއްގެ ގޮތުގައި ވަރަށް ރަނގަަޅަށް ކެޓްރީނާ މަސައްކަތް ކުރާނެ ކަމަށް. އަދި ކެޓްރީނާ އަށް ހެޔޮ އެދުން ފޮނުވަން،" އޭޝްގެ ކުރީގެ ލޯބިވެރިޔާ ސަލްމާން ހާނާ ރައްޓެހިވެގެން ދުވަސްތަކެއް ވަންދެން އުޅުނު ކެޓްރީނާ އަށް މަރުހަބާ ކިޔަމުން އޭޝް ބުންޏެވެ.