ފެބްރުއަރީ 8، 2012 ގައި އައްޑޫގައި ހިންގި ހުޅު ޖެހުމުހެ ހާދިސާގައި ދައުލަތުން ޓެރަރިޒަމްގެ ދައުވާ ކުރި ނަމަވެސް، އެ މައްސަލާގައި އޭނާގެ މައްޗަށް ހުކުމެއް ނާންނާނެ ކަމުގެ ޔަގީންކަން އޮތް ކަމަށް ފޭދޫ ދާއިރާގެ ކައުންސިލަރު އަހުމަދު މިރުޒާދު (މިރާ) މިރޭ ވިދާޅުވެއްޖެ އެވެ.
ރައްޔިތުންގެ މަޖިލީހަށް އެމްޑީޕީ ޓިކެޓްގައި ވާދަ ކުރަން، އެ ޕާޓީގެ ޕްރައިމެރީ އަށް ވާދަ ކުރާ މިރާގެ ކެމްޕޭން ލޯންޗް ކުރަން އޭނާގެ "ކޭމްޕް އަހުމަދު މިރުޒާދު" ކުރިމަތީގައި ބޭއްވި ބައްދަލުވުމުގައި މިރާ ވިދާޅުވީ އޭނާގެ މައްޗަށް ކުރާ ޓެރަރިޒަމްގެ ދައުވާ ޕީޖީން ކްރިމިނަލް ކޯޓަށް ފޮނުވުމުން، އެ ދައުވާ އަނބުރާ ޕީޖީ އަށް ކޯޓުން ފޮނުވާފައިވާ ކަމަށެވެ.
އަދި އެ މައްސަލާގައި ކުރާ ދައުވާ އަށް ބަލާ އިރު، ހުޅުޖެހި ހާދިސާ ހިނގި ވަގުތު އޭނާ އޮތީ ހޮސްޕިޓަލްގައި އެޑްމިޓްކޮށްފައި ކަމަށް ވިދާޅުވި އެވެ.
އެހެންވެ އެއީ އޭނާގެ މައްޗަށް އެއްގޮތަކަށް ވެސް އުފުލޭނެ ދައުވާއެއް ނޫން ކަމަށް މިރާ ވިދާޅުވި އެވެ.
މީގެ އިތުރުން ގަމުގެ އީކްއޭޓާ ވިލެޖްގައި ބަނގުރާ ބުއި ކަމަށް ބުނެ ކުރާ ދައުވާއަކީ ވެސް އޭނާގެ މައްޗަށް ކުރެވޭނެ ދައުވާއެއް ނޫން ކަމަށާއި އެ މައްސަލަ މިހާރު ކުރިއަށް ނުދާ ކަމަށް ވެސް ވިދާޅުވި އެވެ.
އެހެންވެ އޭނާގެ މައްޗަށް އެއްވެސްް ހުކުމެއް އަންނާނެ ކަމަށް ގަބޫލް ނުކުރައްވާ ކަމަށް މިރޭ ވިދާޅުވި އެވެ.
އޭނާ އަދި ވިދާޅުވީ އޭނާ އާ ބެހޭ ގޮތުން ރަށު ތެރޭގައި ތަފާތު ގޮތްގޮތަށް ވާހަކަަތައް ދައްކަމުންދާ ކަމަށެވެ. އަދި އެފަދަ އެއްވެސް ވާހަކައަކީ އެއްވެސް ހަގީގަތެއް އޮވެގެން ދައްކާ ވާހަކަތަކެއް ނޫން ކަމަށް ވިދާޅުވި އެވެ.
އަދި މިހާތަނަށް ކައުންސިލްގައި ވެސް އޭނާ މަސައްކަތް ކުރެއްވީ ވަރަށް އިހުލާސްތެރިކަމާ އެކު ކަމަށާއި ރަށުގެ ތަރައްގީ އަށް ވެސް ކަންކަން ކުރެވިފައިވާ ކަމަށާއި އެެކަން ރައްޔިތުން ވެސް ގަބޫލް ކުރާނެ ކަމަށް ވިދާޅުވި އެވެ.
މިރާ އަދި ވިދާޅުވީ އޭނާއަކީ ދުވަހަކު ވެސް ޕާޓީ ބަދަލު ކުރައްވާނެ ބޭފުޅެއް ނޫން ކަމަށެވެ. މީގެ ކުރިން ޖުމްހޫރީ ޕާޓީން ވެސް ބޮޑެތި އަދަދުތަކުން އެ ޕާޓީ އަށް ބަދަލުވާން އެދި ގިނަ ހުށަހެޅުންތަކެއް ހުށަހެޅި ކަމަށް ވިދާޅުވި އެވެ.
އެހެން ނަމަވެސް އޭނާއަކީ ފައިސާ އަށް އެމްޑީޕީ ދޫކޮށްފައި ދާނެ މީހެއް ނޫން ކަމަށާއި އަބަދު ވެސް ހުންނާނީ އެމްޑީޕީ މެމްބަރެއްގެ ގޮތުގައި ކަމަށް ވިދާޅުވި އެވެ.
މިރާ ވިދާޅުވީ އޭނާ ރައްޔިތުންގެ މަޖިލީހަށް ކުރިމަތިލާން ނިންމީ އެ ދައިރާގެ ތަރައްގީ އާއި ކުރިއެރުމަށް އިހުލާސްތެރި މަސައްކަތެއް ކުރުމުގެ މަގުސަދުގައި ކަމަށެވެ.
އަދި އެމްޑީޕީން މި މަހުގެ 24 ގައި ބާއްވާ ޕްރަމެރީ ކާމިޔާބް ކުރެވޭނެ ކަމާ ދޭތެރޭ ޝައްކެއް ނެތް ކަމަށް ވެސް ވިދާޅުވި އެވެ.
އޭނާ ވިދާޅުވީ ޕްރައިމެރީ އޭނާ އަށް ކާމިޔާބް ނުވެއްޖެ ނަމަ، ޕްރައިމެރީ ކާމިޔާބް ކުރާ ކެންޑިޑޭޓެއްގެ ފަހަތުގައި އެމްޑީޕީގެ ލަޝްކަރާ އެކު އެ މީހަކު ހޮަވަން މަސައްކަތް ކުރައްވާނެ ކަމަށެވެ.
އަދި ފޭދޫ ދާއިރާގެ ގޮނޑި އެމްޑީޕީ ނޫން ޕާޓީއެއްގެ ކެންޑިޑޭޓަކަށް ކާމިޔާބް ނުކުރެވޭނެ ކަމަށް ވެސް ވިދާޅުވި އެވެ.
މިރާގެ ކެމްޕޭން ލޯންޗް ކުރަން ބޭއްވި ހަފުލާގައި އާންމުން ކުރި ސުވާލްތަކަށް އޭނާ ވަނީ ޖަވާބު ވެސް ދެއްވައިފަ އެވެ. އަދި ބޮނޑިބަތް ކެއުން ވެސް އެތަނުގައި އޮތެވެ.